কামৰূপ জিলাত গেলামালৰ দোকান খোলাৰ সময়সীমা বান্ধি দিছে প্ৰশাসনে

কামৰূপ জিলা (মেট্ৰ’ নহয়)ত লকডাউনৰ সময়ত গেলামালৰ দোকানসমূহ খোলাৰ সময়সীমা বান্ধি দিছে জিলা প্ৰশাসনে।

লকডাউনৰ সময়ত দিনৰ ১০ বজাৰ পৰা ১ বজালৈকে দোকানসমূহ খোলা ৰাখি তাৰ পিছত বন্ধ কৰাৰ নিৰ্দেশ দিয়া হৈছে।

গেলামালৰ দোকানীসকলে শাক-পাচলিও বিক্ৰী কৰিব পাৰিব।

এই নিয়ম উলংঘা কৰাসকলক জৰিমনা আৰু কাৰাৱাসপৰ্য্যন্ত শাস্তি বিহা হ’ব পাৰে বুলিও নিৰ্দেশটোত কোৱা হৈছে।

গ্ৰাহকসকলে বজাৰ কৰিবলৈ বাহন লৈ যাব নোৱাৰিব।

এই নিৰ্দেশ তৎকালে কাৰ্য্যকৰী হ’ব আৰু ১৪ এপ্ৰিললৈকে বলৱৎ থাকিব।

দেশত কৰ’নাভাইৰাছত আক্ৰান্তৰ সংখ্যা ৫৬২ গৰাকীলৈ বৃদ্ধি পাইছে।

উত্তৰ-পূবৰ মণিপুৰ আৰু মিজোৰামত এগৰাকীকৈ কৰ’নাভাইৰাছ আক্ৰান্ত চিনাক্ত হৈছে। অসমত এতিয়ালৈকে কোনো আক্ৰান্ত হোৱাৰ খবৰ অহা নাই।

দেশত ৪০ গৰাকী কৰ’নাভাইৰাছ আক্ৰান্তক চিকিৎসালয়ৰ পৰা যাবলৈ দিয়া হৈছে। ১০ গৰাকী লোকে এই ৰোগত প্ৰাণ হেৰুৱাইছে।

প্ৰধান মন্ত্ৰী নৰেন্দ্ৰ মোদীয়ে ইতিমধ্যে কৰ’নাভাইৰাছ প্ৰতিহত কৰাৰ বাবে সমগ্ৰ দেশত ২১ দিনৰ লকডাউন ঘোষণা কৰিছে।

প্ৰধান মন্ত্ৰীয়ে দেশৰ প্ৰত্যেকজন লোককে মহামাৰীবিধক গুৰুত্বসহকাৰে লৈ ঘৰতে থাকিবলৈ আহ্বান জনাইছে।