বানক ৰাষ্ট্ৰীয় সমস্যা, ব্ৰহ্মপুত্ৰৰ খনন ক’তোৱেই নাই কেন্দ্ৰৰ সন্মতি : নিষ্ফল অসমবাসীৰ দাবী

অসমৰ বানক ৰাষ্ট্ৰীয় সমস্যা হিচাপে ঘোষণা কৰিব পৰা নাযাৱ। সেইদৰে অৰ্থনৈতিক আৰু বাস্তৱিকভাৱে সম্ভৱ নহ’ব ব্ৰহ্মপুত্ৰৰ খনন। সোমবাৰে সদনত এই কথা স্পষ্ট কৰি দিলে কেন্দ্ৰই।

সুদীৰ্ঘ দিন ধৰি অসমৰ বিভিন্ন দল-সংগঠনে বানক ৰাষ্ট্ৰীয় সমস্যা হিচাপে ঘোষণা কৰাৰ বাবে দাবী জনাই আহিছে। কিন্তু সোমবাৰে ৰাজ্যসভাত কেন্দ্ৰীয় জল শক্তি বিভাগৰ ৰাজ্য মন্ত্ৰী ৰতনলাল কাটাৰিয়াই এই দাবীৰ প্ৰসংগকে নস্যাৎ কৰে।

ৰাজ্যসভাত অসমৰ সাংসদ বিশ্বজিৎ দৈমাৰীয়ে অসমৰ বান সমস্যা সন্দৰ্ভত সোধা এক প্ৰশ্নৰ উত্তৰত কেন্দ্ৰীয় মন্ত্ৰী কাটাৰিয়াই কয় যে বানপানী হৈছে এক দুৰ্যোগ আৰু চৰকাৰী নীতি-নিয়ম অনুসৰি কোনো দুৰ্যোগকে ৰাষ্ট্ৰীয় সমস্যা হিচাপে ঘোষণা কৰা নহয়।

মন্ত্ৰী কাটাৰিয়াৰ বক্তৱ্যৰ পৰা স্পষ্ট হৈ পৰে যে কেন্দ্ৰই আৰু অসমৰ বান সমস্যাক ৰাষ্ট্ৰীয় সমস্যা হিচাপে ঘোষণা নকৰে। অৱশ্যে, মন্ত্ৰীগৰাকীয়ে বানৰ ফলত অসমত সৃষ্টি হোৱা সমস্যাৰ কথা স্বীকাৰ কৰি প্ৰাকৃতিক দুৰ্যোগ হিচাপে কেন্দ্ৰই ৰাজ্যখনলৈ সাহায্য আগবঢ়াই অহাৰ কথা দোহাৰে।

আনহাতে, কেন্দ্ৰীয় মন্ত্ৰীগৰাকীয়ে কালি সংসদত অসমৰ জনসাধাৰণে দীৰ্ঘদিন ধৰি আশা কৰি থকা ব্ৰহ্মপুত্ৰৰ খনন নহয় বুলি স্পষ্ট কৰি দিয়ে। সাংসদ ৰিপুন বৰাই ব্ৰহ্মপুত্ৰৰ খনন সন্দৰ্ভত সোধা এক প্ৰশ্নৰ উত্তৰত কেন্দ্ৰীয় মন্ত্ৰীগৰাকীয়ে কয় যে ব্ৰহ্মপুত্ৰ খননৰ বিষয়টো অধ্যয়ন কৰিবলৈ কেন্দ্ৰ আৰু ৰাজ্য চৰকাৰে এখন বিশেষ কমিটি গঠন কৰি দিছিল।

উক্ত কমিটি খনে দিয়া পৰামৰ্শ অনুসৰি ব্ৰহ্মপুত্ৰ খনন কৰাটো সম্ভৱ নহয় বুলি মন্ত্ৰী কাটাৰিয়াই জানিবলৈ দিয়ে। তদুপৰি, ব্ৰহ্মপুত্ৰৰ খহনীয়া সমস্যা ৰোধৰ বাবে ব্ৰহ্মপুত্ৰ বোৰ্ডে কাম কৰি আছে বুলি উল্লেখ কৰি বোৰ্ডে দাখিল কৰা ৫৮খন মাষ্টাৰ প্লেন আঁচনিৰ ৫০খন আঁচনিত কেন্দ্ৰীয় চৰকাৰে অনুমোদন জনোৱা বুলি সদৰী কৰে।