টীয়কত বহিৰ্ৰাজ্যৰ পৰা অহা ২৪ জন শ্ৰমিকক অস্থায়ী কক্ষলৈ প্ৰেৰণ

চৰকাৰে আন্ত:জিলা পৰিবহন ব্যৱস্থা অহা ৩০ এপ্ৰিল তাৰিখলৈকে মুকলি কৰি দিছে আৰু পৰিবহনৰ বাবে অনলাইন অথবা ১০৪ ৰ যোগেদি নিজ নিজ গন্তব্য স্থানলৈ যাবলৈ টিকটৰ ব্যৱস্থা কৰি দিছে।

এনে সময়তে সুদুৰ অৰুণাচলৰ নামচাইৰ কয়লা খনিত কৰ্মৰত ২৪ জনীয় এটা শ্ৰমিকৰ দল খোজ কাঢ়ি আহি থকা অৱস্থাত দেওবাৰে সন্ধিয়া যোৰহাট জিলাৰ টীয়কৰ চেলেংহাট আৰক্ষী চকীৰ অন্তৰ্গত এক অঞ্চলৰ পৰা প্ৰশাসনৰ সহযোগত উদ্ধাৰ কৰা হয়।

তেওঁলোকক পিছত টীয়ক উচ্চতৰ মাধ্যমিক বালিকা বিদ্যালয়ত সাময়িকভাৱে স্থাপন কৰা অস্থায়ী কক্ষত ৰখাৰ ব্যৱস্থা কৰে।

ইতিমধ্যে জিলা যুটীয়া সঞ্চালকালয়ৰ অধীনৰ কোভিড-১৯ কক্ষৰ কৰ্তব্যৰত এম পি ডব্লিও সকলে এই শ্ৰমিকসকলৰ স্বাস্থ্য পৰীক্ষা আৰম্ভ কৰিছে আৰু এই পৰ্যন্ত এই শ্ৰমিকসকলৰ দেহত কোনো ধৰণৰ লক্ষণ পৰিলক্ষিত হোৱা নাই বুলি মন্তব্য কৰিছে।

তদুপৰি, চৰকাৰী নীতি-নিৰ্দেশনাৰ মৰ্মে এইসকল শ্ৰমিকক অনাগত সময়ত নিজ গন্তব্য স্থানলৈ প্ৰশাসনে প্ৰেৰণৰ ব্যৱস্থা গ্ৰহণ কৰাৰ কথা অৱগত কৰিছে টীয়ক ৰাজহ চক্ৰ বিষয়া আকাশী দুৱৰাই l