অনৈতিক কাৰ্যত লিপ্ত থকা অৱস্থাত বৰা ছাৰ্ভিছৰ পৰা দুজন ব্যৱসায়ী আৰু এগৰাকী মহিলাক আটক

মহানগৰীৰ পল্টন বজাৰ আৰক্ষীয়ে দেওবাৰে নিশা বৰা ছাৰ্ভিচৰ অতিথিশালাৰ পৰা নাৰী দেহ ব্যৱসায়ৰ সৈতে জড়িত এটা চক্ৰক উৎখাত কৰা ঘটনাই মহানগৰীত চাঞ্চল্যৰ সৃষ্টি কৰিছে।

প্ৰাপ্ত তথ্য মতে পল্টন বজাৰ আৰক্ষী ধৰণী বৰ্মনে এক গোপন সূত্ৰৰ পৰা বৰা ছাৰ্ভিচৰ শ্ৰীৰাম অতিথিশালাত এটা দুষ্ট চক্ৰই আজি কিছু দিনৰ পৰা অনৈতিক কাৰ্যৰ লগতে জুৱা খেলো চলাই থকা বুলি তথ্য লাভ কৰে। ফলত ধৰণী বৰ্মনে এই সূত্ৰৰ আধাৰত তাৎক্ষণিকভাৱে অতিথিশালাটোত দেওবাৰে নিশা অভিযান চলায়।

অভিযানকালত আৰক্ষীয়ে দুগৰাকী ব্যৱসায়ী আৰু এগৰাকী মহিলাক অনৈতিক কাৰ্যত লিপ্ত থকা অৱস্থাত হাতে-লোটে ধৰা পেলায় আৰু কৰায়ত্ত কৰে। ব্যৱসায়ী দুজনক আৰক্ষীয়ে নিখিল দাস আৰু মানিক ৰাম বুলি চিনাক্ত কৰিছে।

আনহাতে অভিযানকালত অন্য ৭ জন জুৱাৰীক অতিথিশলাটোত জুৱা খেল খেলি থকা অৱস্থাত আটক কৰে। আৰক্ষীয়ে অতিথিশালাটোত চলি থকা জুৱা খেল আৰু নাৰী দেহ ব্যৱসায়ৰ সৈতে অতিথিশালাটোৰ স্বাত্বাধিকাৰ ৰঞ্জন পাটগিৰী জড়িত থকা বুলি সন্দেহ প্ৰকাশ কৰিছে।

আৰক্ষীয়ে ইতিমধ্যে আটক কৰা লোককেইজনৰ বিৰুদ্ধে গোচৰ ৰুজু কৰি ঘটনা সম্পৰ্কত অনুসন্ধান অব্যাহত ৰাখিছে বুলি জানিব পৰা গৈছে।