চীনৰ সৈতে চলি থকা বিবাদৰ মাজতে আজি হঠাৎ লাডাখত উপস্থিত প্ৰধান মন্ত্ৰী মোদী

সীমান্তত চীনৰ সৈতে চলি থকা সংঘাতৰ মাজতেই আজি ৰাতিপুৱা হঠাৎ লাডাখৰ নিমুত উপস্থিত হয় প্ৰধান মন্ত্ৰী নৰেন্দ্ৰ মোদী। তাত উপস্থিত হৈ প্ৰধান মন্ত্ৰী মোদীয়ে জোৱানসকলৰ সৈতে মত বিনিময় কৰে।

জানিব পৰা মতে, মোদীয়ে এই পৰিদৰ্শনৰ সময়ত ১৪ কৰ্পছৰ বিষয়াৰ সৈতে আলোচনা কৰিব। তদুপৰি চীফ অৱ ডিফেন্স ষ্টাফ বিপিন ৰাৱাট আৰু ভাৰতীয় সেনাৰ মুৰব্বী জেনেৰেল এম এম নাৰাৱানৰ সৈতে একেলগে সীমান্তৰ বৰ্তমান পৰিস্থিতিৰ বুজ ল’ব।

এই ভ্ৰমণৰ সময়ত উত্তৰ আৰ্মী কমাণ্ডাৰ লেফটেণেণ্ট জেনেৰেল বাইকে জোশী আৰু লেফটেণেণ্ট জেনেৰেল হৰিন্দৰ সিং উপস্থিত থাকিব।

উল্লেখ্য যে মে’ মাহৰ পৰা চলি আছে চীন-ভাৰতৰ সীমাকেন্দ্ৰিক বিবাদ। ইয়াৰ মাজতে আজি প্ৰধান মন্ত্ৰী মোদী ইয়াত হঠাৎ উপস্থিত হৈ দেশবাসীৰ লগতে সেনা জোৱান সকলোকে আশ্বৰ্যকৰ কৰি তোলে।

আজি লেহ ভ্ৰমণৰ বাবে প্ৰতিৰক্ষা মন্ত্ৰী ৰাজনাথ সিং অহাৰ কথা আছিল যদিও কিছু কাৰণত তেওঁৰ এই ভ্ৰমণ বাতিল হোৱাৰ পিছত চি ডি এছ বিপিন ৰাৱাট অকলে অহাটো নিশ্চিত হৈছিল।

উল্লেখ্য যে, লাডাখত শেহতীয়াভাৱে ১৫ জুনত চীনা সেনাৰ সৈতে হোৱা মুখামুখি সংঘৰ্ষত ২০ জন ভাৰতীয় সেনা বাহিনীৰ জোৱান ছহিদ হৈছিল।

এই ৰক্তক্ষয়ী সংঘৰ্ষৰ পিছৰে পৰা দুয়োখন দেশৰ সেনাই বিভিন্ন পৰ্যায়ত কেইবাবাৰো আলোচনাত মিলিত হৈ পৰিস্থিতি স্বাভাৱিক পৰ্যায়লৈ ঘূৰাই অনাৰ চেষ্টা অব্যাহত ৰাখিছে।