ব্ৰাহ্মণ উন্নয়ন পৰিষদ গঠনৰ দাবী ব্ৰাহ্মণ যুৱ পৰিষদৰ বিটিচি অঞ্চল শাখাৰ

ব্ৰাহ্মণ উন্নয়ন পৰিষদ গঠনৰ দাবী উত্থাপন কৰিছে সদৌ ব্ৰাহ্মণ যুৱ পৰিষদৰ বিটিচি শাখাই।

সংগঠনটোৱে বিটিচিৰ অন্তৰ্গত বিভিন্ন ভাষা-ভাষী ব্ৰাহ্মণ সম্প্ৰদায়ৰ লোকসকলৰ উন্নয়নৰ বাবে দাবী কৰিছে ব্ৰাহ্মণ উন্নয়ন পৰিষদ।

দেওবাৰে টংলাত অনুষ্ঠিত কেন্দ্ৰীয় কাৰ্যনিৰ্বাহক সভাত এই দাবী কৰে সংগঠনটোৰ সভাপতি তীৰ্থ ৰঞ্জন গোস্বামীয়ে।

গোস্বামীয়ে লগতে কয় যে বিটিচি বিভিন্ন ভাষা-ভাষী ব্ৰাহ্মণ সম্প্ৰদায়ক সাঙুৰি সাংগঠনিক ভিত্তি শক্তিশালী কৰাৰ লগতে ব্ৰাহ্মণসকলৰ জনসংখ্যাৰ পৰিসংখ্যাগত চিত্ৰ নিৰ্ধাৰণৰ বাবে ডাটাবেচ তৈয়াৰী এক প্ৰকল্পও গ্ৰহণ কৰা হ’ব।

“আমাৰ সম্প্ৰদায়টোৰ আৰ্থ-সামাজিক উন্নয়নৰ বাবে আমি ব্ৰাহ্মণ উন্নয়ন পৰিষদ দাবী কৰিছো।” গোস্বামীয়ে কয়।

তেওঁ লগতে কয় যে আগন্তুক বিটিচি নিৰ্বাচনত যি দলে সম্প্ৰদায়টোৰ সামগ্ৰিক উন্নয়নৰ বাবে কৰ্মসূচী প্ৰস্তুত কৰিব সেই দলকে সংগঠনটোৱে সমৰ্থন কৰিব।

আজি কেন্দ্ৰীয় কাৰ্যনিৰ্বাহক বৈঠকত সংগঠনটোৰ কেন্দ্ৰীয় সাংগঠনিক সম্পাদক কৌস্তভমণি শৰ্মাৰ লগতে বিটিচি অঞ্চলৰ প্ৰায়সকল সদস্যই উপস্থিত আছিল।