নিলম্বিত সাংসদ কেইজনে ক্ষমা খোজাৰ পিছতহে প্ৰত্যাহাৰ হ’ব নিলম্বন : কেন্দ্ৰীয় মন্ত্ৰী ৰবি শংকৰ প্ৰসাদ

ৰাজ্যসভাৰ পৰা নিলম্বিত সাংসদ কেইজনে ক্ষমা খোজাৰ পিছতহে তেওঁলোকৰ নিলম্বনৰ বিষয়টো সন্দৰ্ভত পুনৰ্বিচাৰ কৰিব পৰা যাব বুলি কেন্দ্ৰীয় মন্ত্ৰী ৰবি শংকৰ প্ৰসাদে কৈছে।

মঙলবাৰে কংগ্ৰেছ দলৰ নেতৃত্বত কেইবাটাও বিৰোধী দলে সাংসদ কেইগৰাকীৰ নিলম্বন প্ৰত্যাহাৰ কৰাৰ দাবী জনাই সদন ত্যাগ কৰাৰ পিছতে কেন্দ্ৰীয় মন্ত্ৰী গৰাকীয়ে এই মন্তব্য প্ৰদান কৰে।

নিলম্বন প্ৰত্যাহাৰৰ দাবীত উচ্চ সদন এৰা দল কেইটা হৈছে কংগ্ৰেছ, আপ, তৃণমূল কংগ্ৰেছ, বাওঁ দল সমূহৰ লগতে এন চি পি, আৰ জে ডি আৰু সমাজবাদী পাৰ্টি।

ইফালে সংসদ ভৱন পৰিসৰত সংবাদমেল সম্বোধন কৰি প্ৰসাদে কয়, ‘আমি ভাবিছিলোঁ কংগ্ৰেছ দলে বিপক্ষ দলৰ সাংসদে কৰা অভব্য আচৰণৰ বিৰোধিতা কৰিব’।

“ৰাজ্যসভাৰ পৰা নিলম্বিত হোৱ সদস্যসকলে তেওঁলোকে কৰা আচৰণৰ বাবে ক্ষমা খুজিলেহে নিলম্বন প্ৰত্যাহাৰ সন্দৰ্ভত আলোচনা কৰা হ’ব”, এইদৰে কয় প্ৰসাদে।

ইয়াৰ উপৰি তেওঁ কয়, “এইটো কেনেধৰণৰ ৰাজনীতি… যেতিয়া বিদেশৰ পৰা টুইট আহে… আৰু সাংসদ সকলে এই ধৰণৰ ব্যৱহাৰ কৰে….”।

মন্ত্ৰী প্ৰসাদে কংগ্ৰেছৰ প্ৰাক্তন অধ্যক্ষ ৰাহুল গান্ধীক উদ্দেশ্য কৰিয়েই এই মন্তব্যটো প্ৰদান কৰা বুলি জানিব পৰা গৈছে। কিয়নো বৰ্তমান ৰাহুল গান্ধী নিজৰ মাতৃ ছোনিয়া গান্ধীৰ সৈতে বিদেশত আছে।