আমেৰিকাৰ নিৰ্বাচনৰ পূৰ্বে ১০ অক্টোবৰত কিম জং উনে প্ৰদৰ্শন কৰিব শক্তি; চিন্তা বাঢ়িছে ট্ৰাম্পৰ

বিশ্বজুৰি কৰ’না ভাইৰাছৰ সংহাৰৰ মাজতে উত্তৰ কোৰিয়াৰ একনায়কত্ববাদী নেতা কিম জং উনে নিজৰ শক্তি প্ৰদৰ্শনৰ প্ৰস্তুতি চলাইছে।

অহা ১০ অক্টোবৰ শাসকীয় দলৰ বৰ্ষপূৰ্তি উপলক্ষে কিম জঙে পুনৰ এবাৰ সেনা শক্তি প্ৰদৰ্শন কৰিব য’ত এইবাৰ অধিক শক্তিশালী আৰু দীৰ্ঘ দূৰত্ব ভেদিব পৰা মিছাইলো অন্তৰ্ভুক্ত কৰা হৈছে।

আমেৰিকাৰ নিৰ্বাচনৰ পূৰ্বে কিম জং উনৰ এই শক্তি প্ৰদৰ্শনে ৰাষ্ট্ৰপতি ট্ৰাম্পৰ জটিলতা বৃদ্ধি কৰিব পাৰে বুলি অনুমান কৰা হৈছে।

উল্লেখ্য যে পৰমানু অস্ত্ৰৰ নিৰ্মাণক লৈ আমেৰিকা আৰু উত্তৰ কোৰিয়াৰ মাজত পূৰ্বৰে পৰা উত্তেজনা চলি আছে। ইয়াৰ বাবেই আমেৰিকাই উত্তৰ কোৰিয়াৰ ওপৰত কঠোৰ অৰ্থনৈতিক প্ৰতিবন্ধকতাও আৰোপ কৰিছে।

কিন্তু কৰ’না সংকট তথা অৰ্থনৈতিক প্ৰতিবন্ধকতাৰ মাজতো কিম জং উনৰ স্থিতি তেওঁৰ দেশত অধিক শক্তিশালী হৈ পৰিছে।

কৰ’না ভাইৰাছ মহামাৰীৰ সত্তেও উত্তৰ কোৰিয়াই ক্ষিপ্ৰতাৰে বেলিষ্টিক মিছাইল কাৰ্যসূচী আগবঢ়াই নিছে।

বাতৰি অনুসৰি, উত্তৰ কোৰিয়াই আৰু এটা পৰমানু অস্ত্ৰ নিৰ্মাণ কৰি উলিয়াইছে। চলিত বছৰৰ প্ৰথম ভাগৰ পৰাই উত্তৰ কোৰিয়াই নতুন মিছাইল নিৰ্মাণৰ কাম ক্ষিপ্ৰতাৰে কৰি থকা বুলি কোৱা হৈছে।

সূত্ৰসমূহৰ মতে, উত্তৰ কোৰিয়াৰ নেতা কিম জঙে মিছাইলটো ৪-৪ মোবাইল লাঞ্চাৰৰ সৈতে চহৰৰ বাহিৰৰ সীমান্তত স্থাপন কৰিছে।

আনহাতে, দক্ষিণ কোৰিয়াৰ বিষয়াসকলে জানিবলৈ দিয়া মতে, যিটো বেলিষ্টিক মিছাইল দেখা গৈছে সেইটো ২০১৭চনত উত্তৰ কোৰিয়াই পৰীক্ষা কৰা মিছাইলটোৰ তুলনাত ডাঙৰ আৰু অধিক শক্তিশালী।