আৰক্ষীৰ নিযুক্তি কেলেংকাৰিত এইবাৰ মুখ্য সচিবৰ ভাতৃ কুমাৰ সঞ্জিত কৃষ্ণক চিআইডিৰ তলব!

অসম আৰক্ষীৰ উপ-পৰিদৰ্শক নিযুক্তি পৰীক্ষাৰ প্ৰশ্নকাকত ফাদিল কেলেংকাৰিৰ মূল অভিযুক্ত প্ৰাক্তন ডিআইজি পি কে দত্তৰ গ্ৰেপ্তাৰৰ পাছতে তদন্তকাৰী বিষয়াসকলে বহু বিস্ফোৰক তথ্য লাভ কৰিছে।

ইতিমধ্যে আৰক্ষীয়ে এই কেলেংকাৰিৰ সৈতে জড়িত বহুকেইজন ব্যক্তিক গ্ৰেপ্তাৰ কৰিছে আৰু কেলেংকাৰিৰ শিপা উদ্ধাৰ কৰিবলৈ সক্ষম হোৱা বুলি দাবী কৰিছে।

সংবাদ মাধ্যম অসমীয়া প্ৰতিদিনৰ বাতৰি অনুসৰি, চিআইডিয়ে এইবাৰ কৰিমগঞ্জৰ আৰক্ষী অধীক্ষক কুমাৰ সঞ্জিত কৃষ্ণক তলৱ কৰিছে।

বাতৰি অনুসৰি, জিলাখনৰ অতিৰিক্ত আৰক্ষী অধীক্ষকগৰাকীয়ো এই কেলেংকাৰিৰ সৈতে সাঙোৰ খাই পৰিছে।

উল্লেখ্য যে দেওবাৰে কুমাৰ সঞ্জিত কৃষ্ণক কৰিমগঞ্জৰ পৰা বৰপেটাৰ এফ আৰ আৰ অ’ৰ আৰক্ষী অধীক্ষক হিচাপে বদলি কৰে। সূত্ৰ অনুসৰি, সঞ্জিত কৃষ্ণক শাস্তিমূলকভাৱে এই গুৰুত্বহীন পদটোলৈ বদলি কৰা হয়।

শনিবাৰে এক সংবাদমেলত অতিৰিক্ত আৰক্ষী সঞ্চালক প্ৰধান জি পি সিঙে দুই এদিনৰ ভিতৰতে প্ৰশ্নকাকত ফাদিল কৰা অভিযুক্তক গ্ৰেপ্তাৰ কৰা হ’ব বুলি জানিবলৈ দিছিল।

জানিব পৰা মতে, অক্ষয় টেলিকমিউনিকেশ্যনৰ সৈতে কুমাৰ সঞ্জিত কৃষ্ণৰ সংযোগ উদ্ধাৰ হৈছে। অক্ষয় টেলিকমিউনিকেশ্যনৰ অন্যতম অংশীদাৰ ৰুবুল হাজৰিকাক গ্ৰেপ্তাৰৰ পাছতে তদন্তকাৰী বিষয়াসকলে কেলেংকাৰিটোৰ ৰহস্য উদ্ঘাটন কৰিবলৈ সক্ষম হৈছে।

কিন্তু এই তদন্ত প্ৰক্ৰিয়াৰ মাজলৈ আৰক্ষী অধীক্ষক কুমাৰ সঞ্জিত কৃষ্ণৰ নাম পোহৰলৈ পাছতে উন্মোচিত হৈছে আন এক অধ্যায়।

মুখ্য সচিব কুমাৰ সঞ্জয় কৃষ্ণৰ ভাতৃ কুমাৰ সঞ্জিত কৃষ্ণৰ নাম তদন্ত সাঙোৰ খাই পৰাৰ পাছত তদন্ত প্ৰক্ৰিয়া কিমান স্বচ্ছ হ’ব তাক লৈয়ো একাংশ মহলে সন্দেহ প্ৰকাশ কৰিছে।

আনহাতে, মুখ্য সচিব কুমাৰ সঞ্জয় কৃষ্ণই চলিত অক্টোবৰ মাহৰ শেষত চাকৰিৰ পৰা অৱসৰ গ্ৰহণ কৰিব। ইপিনে, তেওঁ চাকৰি কাল বৃদ্ধিৰ বাবে যৎপৰোনাস্তি চেষ্টা চলাই আছে যদিও এইক্ষেত্ৰত এতিয়ালৈকে কেন্দ্ৰৰ পৰা কোনো সেউজ সংকেত লাভ কৰা নাই।

উল্লেখ্য যে যোৱাবছৰ জুলাইত এয়াৰচেল মেক্সিছ গোচৰত চিবিআইয়ে দাখিল কৰা চাৰ্জশ্বীটত কুমাৰ সঞ্জয় কৃষ্ণৰ নামো অন্তৰ্ভুক্ত হৈছিল।

চিবিআইয়ে দিল্লীৰ পাটিয়ালা হাউচ আদালতত এয়াৰচেল মেক্সিছ গোচৰৰ  এক সজীৱ চাৰ্জশ্বীট দাখিল কৰিছিল। এই চাৰ্জশ্বীটত চিবিআইয়ে পি চিদাম্বৰম আৰু তেওঁৰ পুত্ৰ কাৰ্তি চিদাম্বৰমৰ নামো অন্তৰ্ভুক্ত কৰিছিল।

১৯৮৫বৰ্ষৰ অসম-মেঘালয় কেডাৰৰ আইএএছ সঞ্জয় কৃষ্ণ য়ুপিএ চৰকাৰৰ দ্বিতীয়টো কাৰ্যকালত বিত্ত বিভাগৰ যুটীয়া সচিবৰ দায়িত্বত আছিল।

কেন্দ্ৰত চাকৰিত থকাকালীন দুৰ্নীতিৰ অভিযোগত নাম সাঙোৰ খাই পৰা কুমাৰ সঞ্জয় কৃষ্ণৰ চাকৰিকাল বৃদ্ধি সম্ভাৱনা ক্ষীণ বুলিও এক সূত্ৰই জানিবলৈ দিয়ে।

সূত্ৰ অনুসৰি, ভাতৃ কেলেংকাৰিত সাঙোৰ খাই পৰাত কিছু অস্বস্ত্বিতো পৰিছে মুখ্য সচিবগৰাকী। ৰাজ্যৰ গৃহ বিভাগক কলংকিত কৰা এনে কাণ্ডৰ সৈতে ভাতৃ কুমাৰ সঞ্জিত কৃষ্ণ জড়িত হৈ পৰাটো প্ৰশাসনীয় মুৰব্বীগৰাকীৰ অভিলাষ পূৰণত হেঙাৰ হ’ব পাৰে।