মুকেশ আম্বানিৰ বেয়া দিন! ধনকুবেৰৰ তালিকাৰ আৰু তললৈ নামিল ৰিলায়েন্সৰ গৰাকী

মুকেশ আম্বানিৰ বেয়া দিন আঁতৰা নাই। এছিয়াৰ আটাইতকৈ ধনী ব্যক্তিৰ খিতাপ হেৰুওৱাৰ পাছত এইবাৰ বিশ্বৰ শীৰ্ষ ধনকুবেৰৰ তালিকাত আৰু অৱনতি ঘটিল আম্বানিৰ স্থান।

কিছুদিন পূৰ্বে ব্লুমবাৰ্গৰ তালিকাৰ শীৰ্শ দহটা স্থানৰ পৰা আঁতৰি এঘাৰ নম্বৰ স্থানলৈ অৱনতি ঘটনা আম্বানি এইবাৰ তেৰ নম্বৰ স্থানলৈ নামিল।

বৰ্তমান আম্বানিৰ মুঠ সম্পত্তিৰ মূল্য ৭৩.৪ বিলিয়ন ডলাৰ। ভাৰতীয় হিচাপত এই মূল্য হৈছে ৫.৩৬লাখ কোটি টকা।

যোৱা বছৰৰ আৰম্ভণিত এই পৰিমান আছিল ৯০ বিলিয়ন ডলাৰ অৰ্থাৎ ৬.৬২লাখ কোটি টকা। সেই হিচাপে যোৱা এবছৰত মুঠ সম্পত্তিৰ পৰিমান ১লাখ কোটি টকাৰো অধিক হ্ৰাস পাইছে।

হঠাতে কিয় মুকেশ আম্বানিৰ এনে অৱস্থা হ’ল? যোৱা আগষ্ট মাহতো তেওঁ ব্লুমবাৰ্গৰ তালিকাৰ চাৰি নম্বৰ স্থানত আছিল। মাত্ৰ কেইমাহতে বহু তললৈ নামি যাৱলগীয়া হ’ল মুকেশ আম্বানি।

দৰাচলতে যোৱা তিনি মাহত ৰিলায়েন্সৰ শ্বেয়াৰ হুৰাহুৰে নামি গৈছে। সেয়েহে, আম্বানিৰ মুঠ সম্পত্তিৰ পৰিমানো হ্ৰাস পাইছে।

যোৱা আগষ্টত ২৪,৭১৩ কোটি টকাৰ বিনিময়ত ‘ফিউচাৰ গ্ৰুপ’ৰ খুচুৰা আৰু পাইকাৰী ব্যৱসায় তথা লজিষ্টিক আৰু ৱেৰহাউছিং ব্যৱসায় ৰিলায়েন্সে ক্ৰয় কৰিছিল। সেই সময়ত সংস্থাটোৰ শ্বেয়াৰ মূল্য শীৰ্ষত আছিল।

ইয়াৰ পৰা সংস্থাৰ ১৮.৩শতাংশ শ্বেয়াৰ অংকৰ অৱনতি ঘটিছে। ইয়াৰ আঁৰত আছে আমেৰিকাৰ ই-কমাৰ্ছ সংস্থা এমাজনৰ সৈতে ৰিলায়েন্সৰ ব্যৱসায়িক সংঘাত।

ৰিলায়েন্সৰ সৈতে ফিউচাৰ গ্ৰুপৰ চুক্তিক লৈ এমাজনৰ আপত্তি আছে। যোৱা বছৰেই ‘ফিউচাৰ কুপনছ’ত প্ৰায় ২০০ মিলিয়ন ডলাৰ বিনিয়োগ কৰিছে সংস্থাটোৱে। এনে পৰিস্থিতিত ফিউচাৰ গ্ৰুপে ৰিলায়েন্সক সকলো সম্পত্তি বিক্ৰী কৰি দিয়াৰ বাবেই এমাজনৰ আপত্তি।

এনে বিবাদ-প্ৰতিবাদৰ মাজতেই আম্বানিৰ ৰিলায়েন্সৰ শ্বেয়াৰ মূল্য হ্ৰাস পাইছে।