কোকৰাঝাৰত প্ৰাক্তন বিএলটি নেতাৰ বাহগৃহত আৰক্ষীৰ তালাচী অভিযান; নেতাৰ প্ৰতিক্ৰিয়া

কোকৰাঝাৰ চহৰৰ চুদেমপুৰীত আৰক্ষীৰ তালাচি অভিযান চলে। প্ৰাক্তন বি এল টি কল্যাণ পৰিষদৰ অধ্যক্ষ জন’মহন মুছাহাৰীৰ বাহগৃহত কোকৰাঝাৰ আৰক্ষীয়ে তালাচী চলায়।

চহৰখনৰ ৪ নং ৱাৰ্ডৰ চুদেমপুৰীস্থিত প্ৰাক্তন বিএলটি কল্যাণ পৰিষদৰ অধ্যক্ষ জন’ মহন মুছাহাৰীৰ বাহগৃহত আৰক্ষীয়ে তালাচি অভিযান অব্যাহত ৰখা সময়তে ভুক্তভোগী জন’মহনে বাহগৃহ পৰাই প্ৰকাশ কৰিলে পৰিষদৰ মুল মন্ত্ৰ।

পৰিষদে পুৰ্বৰ পৰাই বডোলেণ্ডত শান্তি স্থাপন, শৃংখলা স্থাপন আৰু প্ৰাক্তন বি এল টি সকলৰ গোচৰ মুক্ত তথা পুনৰ সংস্থাপন কৰা কাম কৰি আহিছে।

আৰক্ষীয়ে তালাচি চলোৱাটো ৰাজনৈতিক ষড়যন্ত্ৰ বুলি আখ্যা দিয়ে পৰিষদৰ নেতা গৰাকীয়ে।

দিনৰ ১.৩০ বজা পৰা নেতাগৰাকীৰ বাহগৃহত আৰক্ষীয়ে চলাই তালাচী অভিযান চলায়। কোকৰাঝাৰ আৰক্ষী অধীক্ষক ৰাখেশ ৰোশন আৰু অতিৰিক্ত আৰক্ষী অধীক্ষক মুকুট ৰাভাৰ নেতৃত্বধীন আৰক্ষী দলে বুধবাৰে কোকৰাঝাৰ জিলাৰ অন্তৰ্গত নাশ্ৰাইবিলত এখন স্কৰ্পিঅ’ বাহনৰ পৰাই বৃহৎ পৰিমাণৰ অস্ত্ৰ সহ ৬জন লোকক আটক কৰা পিছতে আজি নেতাৰ বাহগৃহ আৰক্ষীয়ে তালাচী অভিযান চলায়।

তালাচীৰ পিছত আৰক্ষী অধীক্ষক ৰাখেশ ৰোশোনে সদৰী কৰা মতে তালাচীত কিছুমান সামগ্ৰী উদ্ধাৰ হৈছে যদিও কি উদ্ধাৰ হৈছে সেয়া তদন্তৰ বাবে প্ৰকাশ কৰিব নোৱাৰে বুলি কয়।

তিনি ঘন্টা ধৰি তালাচী চলাই আৰক্ষীয়ে কি উদ্ধাৰ কৰিলে সেয়া প্ৰকাশ নকৰাটো একপ্ৰকাৰ লক্ষ্যণীয় হৈ পৰিছে। নেতাৰ বাহগৃহত তালাচী চলাইছে যদিও নেতাগৰাকীক গ্ৰেপ্তাৰ কৰা নাই আৰক্ষীয়ে।

ইপিনে,নেতাগৰাকীয়ে প্ৰকাশ কৰা মতে তেওঁৰ বাহগৃহত চলোৱা তালাচী অভিযানত একো আপত্তিজনক সামগ্ৰী উদ্ধাৰ হোৱা নাই আৰু সোণৰ অলংকাৰ, চেক বুক, আৰু দুটা এয়াৰ গানৰ বাহিৰে একো পোৱা নাই বুলি দাবী কৰে।

তেওঁ ইয়াক এক ৰাজনৈতিক ষড়যন্ত্ৰৰ বাহিৰে একো নহয় বুলি কয়।