দিশা ৰবীৰ গ্ৰেপ্তাৰৰ পাছতে গ্ৰেটাৰ ‘টুকইট’ সন্দর্ভত দুজন পৰিৱেশকৰ্মীলৈ দিল্লী আৰক্ষীৰ চমন জাৰি

পৰিৱেশকৰ্মী তথা ছাত্ৰী দিশা ৰৱীক গ্ৰেপ্তাৰ কৰাৰ এদিন পাছতে গ্ৰেটা থানবাৰ্গৰ টুকইট গোচৰত দিল্লী আৰক্ষীয়ে অধিবক্তা নিকিতা জেকব আৰু এক্টিভিষ্ট শান্তনুৰ ওপৰত স্থানীয় এখন কোৰ্টৰ পৰা জামিনিবহীন গোচৰ তৰা হৈছে।

আজি দিল্লী আৰক্ষীয়ে দাবি কৰে গ্ৰেটাৰ টুকইটৰ নেপথ্যত থকা পয়েটিক জাষ্টিছ ফাউণ্ডেশ্যন নামৰ সংস্থাটোৱে গণৰাজ্য দিৱসৰ প্ৰাকক্ষণত মুম্বাইৰ নিকিতা জেকবৰ স’তে যোগাযোগ ৰাখিছিল।

সংস্থাটোৰ উদ্দেশ্য আছিল গণৰাজ্য দিৱসত কৃষকসকলে কৰা প্ৰতিবাদী ট্ৰেক্টৰ ৰেলীৰ উদ্দেশ্যে টুইটাৰত ব্যাপক চৰ্চাৰ সৃষ্টি কৰা।

দিল্লী আৰক্ষীৰ মতে, উক্ত সংস্থাটোৰ উদ্দেশ্য হৈছে বিচ্ছিন্নতাবাদ তথা খালিস্তান।

১১ ফেব্ৰুৱাৰীত দিল্লী চাইবাৰ চেল আৰক্ষীয়ে জেকবৰ মুম্বাইস্থিত বাসগৃহত তালাচী চলায় কিন্তু আবেলি হোৱাৰ বাবে নিকিতা জেকবক সোধা-পোচা কৰা নহ’ল।

জেকবে আৰক্ষীক সম্পূৰ্ণ সহযোগিতা প্ৰদান কৰাৰ আশ্বাস দিছিল যদিও দিল্লী আৰক্ষীৰ এক সূত্ৰই দাবী কৰিছে যে ১১ ফেব্ৰুৱাৰীৰ পাছতে নিকিতা জেকব পলাতক অৱস্থাত আছে।

ইতিমধ্যে জেকবে বম্বে’ উচ্চ ন্যায়ালয়ত অগ্ৰিম জামিনৰ আবেদন কৰিছে আৰু বিষয়টোৰ শুনানি মঙলবাৰে অনুষ্ঠিত হ’ব।

দিল্লী আৰক্ষীয়ে আৰোপ কৰা অভিযোগসমূহ খণ্ডন কৰি জেকবে বম্বে’ উচ্চ ন্যায়ালয়ক কয় যে বৰ্তমানলৈকে তেওঁ কোনো লিখিত অভিযোগ অথবা এফআইআৰৰ কোনো কপি লাভ কৰা নাই।

তেওঁ আৰু কয় যে ২০১৪ চনৰ পৰা বম্বে’ উচ্চ ন্যায়ালয়ত অধিবক্তাৰ কাম কৰি আহিছে আৰু ‘এক্টিংচন ৰিবেলিয়ন’ নামৰ পৰিৱেশসুৰক্ষাবাদী সংস্থাটোৰ হৈ সেৱা কৰি আহিছে।

উল্লেখযোগ্য যে কেৱল ধাৰণা আৰু আৰোপৰ বাদে দিল্লী আৰক্ষীয়ে এই পৰ্যন্ত গ্ৰেটাৰ টুকইটৰ বিষয়টোক লৈ সম্পূৰ্ণ ব্যাখ্যা আগবঢ়াব পৰা নাই আৰু দিল্লী আৰক্ষীৰ এইসমূহ পদক্ষেপক মানৱ অধিকাৰ কৰ্মী আৰু বিৰোধী ৰাজনৈতিক দলসমূহে নৰেন্দ্ৰ মোদীৰ স্বৈৰতান্ত্ৰিক শাসনক সমালোচনা কৰিছে।