নাছাই দিলে ডাঙৰ খবৰটো—শুকান, ৰুক্ষ ৰঙা গ্ৰহও ভৰি আছে পানীৰে!

ৰঙা গ্ৰহ মঙলকলৈ বিশ্বৰ বিজ্ঞানীসকলৰ লগতে সাধাৰণ মানুহৰো কৌতূহলৰ শেষ নাই।

ইমান দিনে সকলোৱে ভাবি আহিছিল যে  অনৱৰতে ৰেড অক্সাইডৰ দুমুহাই অশান্ত কৰি ৰখা মঙল গ্ৰহত কোনো পানী নাই।

গ্ৰহটোতে পূৰ্বতে পানী আছিল যদিও বহু কোটি বছৰ পূৰ্বে গ্ৰহটোৰ পৰা পানী জলীয় ভাপ হৈ  উৰি গৈছিল।

কিন্তু তাহানিৰ দিনৰে পৰা মানুহৰ মনত শিপাই থকা সেই ধাৰণাক ভূল প্ৰতিপন্ন কৰি নাছাই কৈছে যে শুকান গ্ৰহ মঘলতো পানী আছে।

মঙল গ্ৰহত থকা পানীৰ পৰিমাণ আটলাণ্টিক মহাসাগৰত থকা পানীৰ পৰিমাণৰ প্ৰায় আধা বুলি নাছাই প্ৰকাশ কৰিছে।

নাছাৰ বিজ্ঞানী ইভা স্কেলাৰে ‘জাৰ্নাল ছায়েন্স’ বিজ্ঞান পত্ৰিকাত প্ৰকাশ কৰা এটা নিৱন্ধত এই কথা স্পষ্ট ভাবে উল্লেখ কৰিছে যে মঙল গ্ৰহত এতিয়াও ৩৩ ৰ পৰা ৯৯ শতাংশ পানী আছে।

অৱশ্যে সেই পানী গ্ৰহটোৰ উপৰি ভাগত থকাৰ সলনি ভূগৰ্ভতহে সঞ্চিত হৈ আছে।

কোটি কোটি বছৰ পূৰ্বে মঙল গ্ৰহৰ  বহু পৰিমাণৰ পানী আগ্নেয়গিৰিৰ উদগীৰণ, সূৰ্যৰ তাপত ভাপ হৈ উৰি গৈছিল।

অৱশিষ্ট পানী ভাগ মাটিৰ তললৈ সোমাই গৈছিল।

নাছাৰ বিজ্ঞানীগৰাকীয়ে হাইড্ৰ’জেন আইচোটপ ডাটা ছেটৰ সহায় লৈ মঙল গ্ৰহৰ ভূ গৰ্ভত এতিয়াও বিশাল পৰিমাণৰ পানী থকাৰ কথাটো প্ৰমাণ কৰিবলৈ সক্ষম হৈছে।

তেওঁ লগতে কয় যে মঙল গ্ৰহৰ ভূগৰ্ভত থকা বিভিন্ন ধাতুৰ সংস্পৰ্শলৈ অহাৰ ফলত হয়তো পানী ভাগ ব্যৱহাৰৰ উপযোগী হৈ থকা নাই।

এই সম্দৰ্ভত আৰু অধিক গৱেষণা চলালে মঙলৰ পানীৰ বিষয়ে অধিক তথ্য লাভ কৰিব পৰা যাব বুলি নাছাৰ বিজ্ঞানীগৰাকীয়ে প্ৰকাশ কৰে।