মন্ত্ৰী প্ৰমীলা ৰাণী ব্ৰহ্মৰ ঘৰত মাজনিশা কি ঘটিছিল? কিয় আটক কৰিলে প্ৰাৰ্থীগৰাকীৰ দেহৰক্ষীক?

দেওবাৰে মাজনিশা কোকৰাঝাৰ পূব সমষ্টিৰ বিপিএফ প্ৰাৰ্থী তথা অসম চৰকাৰৰ মন্ত্ৰী প্ৰমিলা ৰাণী ব্ৰহ্মৰ ঘৰত হঠাতে উপস্থিত হয় কোকৰাঝাৰ আৰক্ষী।

সেই সময়ত প্ৰমিলা ৰাণী ব্ৰহ্মৰ ঘৰৰ বাহিৰত সহস্ৰাধিক লোকে গোট খাইছিল ।

আৰক্ষীয়ে ১৪৪ ধাৰা ভংগৰ অভিযোগ কৰি সমবেত লোকক ছত্ৰভংগ দিবলৈ যাওঁতেই উত্তপ্ত পৰিস্থিতিৰ সৃষ্টি হয়।

ইপিনে, কোকৰাঝাৰ জিলা আৰক্ষী অধীক্ষক ৰাকেশ ৰৌশনে সংবাদমেল যোগে আৰক্ষীক কৰ্তব্যত বাধা আৰোপ কৰাৰ অভিযোগ উত্থাপন কৰে।

প্ৰবেচনাৰী আইপিএচ বিষয়াক বাধা আৰোপ কৰাৰ অভিযোগ আনিছে আৰক্ষী অধীক্ষক গৰাকীয়ে।

আৰক্ষীয়ে ঘটনাস্থলীত দুজনক আটক কৰে আৰু ইয়াৰে এজন প্ৰমিলাৰ ব্যক্তিগত দেহৰক্ষী ।

আনহাতে, বিপিএফৰ প্ৰাৰ্থী প্ৰমিলা ৰাণী ব্ৰহ্মই ইয়াৰ বিপৰীত ভাষ্য আগবঢ়াইছে।

প্ৰমিলাই কয় যে তেওঁ কৰ্মী-সমৰ্থকৰ সতে কথা পাতি থকাৰ সময়তে আৰক্ষীৰ দল উপস্থিত হয় আৰু তেওঁক দুৰ্বব্যৱহাৰ কৰাৰ লগতে কৰ্মী-সমৰ্থকক উলিয়াই দিয়ে।

এই সন্দৰ্ভত বিপিএফৰ প্ৰাৰ্থী প্ৰমিলা ৰাণী ব্ৰহ্মই নিৰ্বাচন আয়োগক অভিযোগ দিব বুলি জানিবলৈ দিছে।

আনহাতে,  বিপিএফৰ প্ৰাৰ্থী প্ৰমিলা ৰাণী ব্ৰহ্মৰ কৰ্মী-সমৰ্থকৰ ওপৰত লাঠীচালনা কৰাৰ কথা একেষাৰে অস্বীকাৰ আৰক্ষী অধীক্ষক গৰাকীয়ে।

সমগ্ৰ ঘটনাটোক লৈ অঞ্চলটোৰ পৰিস্থিতি উত্তেজনাপূৰ্ণ হৈ আছে।