ক’ভিড-১৯ : আজিৰে পৰা ৩০ এপ্ৰিললৈকে দিল্লীত নৈশ সান্ধ্যআইন

আজিৰে পৰা দিল্লীত নৈশ সান্ধ্যআইন জাৰি কৰা হৈছে।

এই সান্ধ্যআইন ৩০ এপ্ৰিললৈকে বলৱৎ কৰা হ’ব।

ৰাতি ১০ বজাৰ পৰা ৫বজালৈকে এই সান্ধ্যআইন পালন কৰা হ’ব।

সমগ্ৰ দেশত ক’ভিড ৰোগীৰ সংখ্যা এদিনত ১ লাখৰ সীমা স্পৰ্শ কৰাৰ পাছতে দিল্লীৰ প্ৰশাসনে এই ব্যৱস্থা হাতত লৈছে।

দিল্লী চৰকাৰে জনায় যে ক’ভিড-১৯ কেচসমূহ হঠাৎ বৃদ্ধি হোৱালৈ লক্ষ্য ৰাখি দিল্লীত সান্ধ্যআইন পালন কৰাটো অতি জৰুৰী।

সান্ধ্যআইনৰ সময়ছোৱাত অৱশ্যে ভেকচিন প্ৰদান কাৰ্যসূচী আৰু অতি প্ৰয়োজনীয় সেৱাসমূহ অব্যাহত থাকিব বুলি বিভাগীয় পক্ষৰ পৰা জনোৱা হৈছে।

ব্যক্তিগত চিকিৎসক, নাৰ্চ, চিকিৎসাসেৱাত জড়িত কৰ্মচাৰী আৰু সাংবাদিকসকলক নিজৰ পৰিচয় পত্ৰৰ ভিত্তিত সান্ধ্যআইনৰ সময়ছোৱাত যাতায়ত কৰিবলৈ অনুমতি প্ৰদান কৰা হ’ব।

তদুপৰি গৰ্ভৱতী নাৰী আৰু অন্যান্য ৰোগীসকলৰ ক্ষেত্ৰতো এই নিয়ম প্ৰযোজ্য কৰা নহ’ব বুলি জনোৱা হৈছে।

উল্লেখযোগ্য যে ২৫ মিলিয়ন লোকে বাস কৰা দিল্লীত কৰোণাভাইৰাচ সংক্ৰমণ হোৱাৰ পাছত দিল্লী চৰকাৰৰ এইটো আটাইতকৈ কঠিন সিদ্ধান্ত।

সোমবাৰে দিল্লীত ৩,৫৪৮টাকৈ নতুন ক’ভিড কেচ পোৱা গৈছে।

শেহতীয়াকৈ দিল্লীৰ উপৰিও মহাৰাষ্ট্ৰ আৰু ৰাজস্থান চৰকাৰেও নৈশ সান্ধ্যআইন পালন কৰিছে।