বিশ্বনাথত চিকিৎসকক আক্ৰমণৰ ঘটনা: জ্যেষ্ঠ চিকিৎসকক প্ৰহাৰ কৰা দুজনক গ্ৰেপ্তাৰ

বিশ্বনাথৰ মাজুলীগড় চাহ বাগিচাৰ চিকিৎসকক আক্ৰমণ কৰা দুজন অভিযুক্ত ব্যক্তিক আটক কৰিছে আৰক্ষীয়ে।

দুদিন পূৰ্বে মাজুলীগড় চাহ বাগিচাৰ চিকিৎসক বসন্ত কুমাৰ গোস্বামীক এচাম দুষ্কৃতিকাৰীয়ে আক্রমণ কৰা ঘটনা সন্দৰ্ভত বিশ্বনাথ চাৰিআলি আৰক্ষী চকীত ৰুজু হোৱা গোচৰ নং 167/21 u/s143/447/352/ 325/307 IPC R/E W Sec 51(b) DM Act ৰ অধীনত মাজুলীগড় চাহ বাগিচাৰ ১০ নং লাইনৰ অজিত তাঁতি (৩৮) আৰু সুজিত তাঁতি (২৫) নাম দুজন আক্ৰমণকাৰীক বিশ্বনাথ আৰক্ষীয়ে আটক কৰি ঘটনা সন্দৰ্ভত তদন্ত অব্যাহত ৰাখিছে ।

যোৱা বুধবাৰে বিয়লি ৮০বছৰ বয়সীয়া চিকিৎসকগৰাকীক ‘ইভিনিং ৱাক’ কৰিবলৈ যোৱা সময়ত দুস্কৃতিকাৰীৰ এটা দলে প্ৰহাৰ কৰিছিল।

তেওঁৰ ঘৰত কৰ্মৰত কৰ্মচাৰীৰ তৎপৰতাত কথমপি প্ৰাণ ৰক্ষা পৰিছিল চিকিৎসকগৰাকীৰ।

কোভিড পৰিস্থিতিৰ বাবে চৰকাৰে জাৰি কৰা নিৰ্দেশনা অনুসৰি বাগিচা কৰ্তৃপক্ষই বাগিচাখনৰ দোকানসমূহ বন্ধ ৰখাৰ চেষ্টা কৰাৰ পাছতে সূত্ৰপাত ঘটিছিল চিকিৎসকক প্ৰহাৰৰ ঘটনাৰ।

বাগিচাখনত দোকানসমূহ বন্ধ কৰিবলৈ দিয়াৰ বাবে বাগিচা কৰ্তৃপক্ষ আৰু চিকিৎসকৰ ওপৰত ক্ষোভিত হৈ একাংশ দুস্কৃতিকাৰীয়ে চিকিৎসকগৰাকীক আক্ৰমণ কৰিছিল।