খ্ৰীষ্টমাছ পেৰেড মহতীয়াই নিলে দ্ৰুতবেগী বাহনে, থিতাতে নিহত পাঁচ জন; চাওক সেই ভয়ানক দুৰ্ঘটনাৰ ভিডিঅ’

আমেৰিকা যুক্তৰাষ্ট্ৰৰ উইচকনচিনৰ ৱাউকেছাত সংঘটিত হৈছে এক ভয়ানক দুৰ্ঘটনা। বাৰ্ষিক পৰম্পৰা খ্ৰীষ্টমাছ পেৰেডত ভাগ লোৱা এটি বৃহৎ সমদলক মহতীয়াই নিলে এখন দ্ৰুতবেগী ৰঙা বাহনে। এই ভয়ানক ঘটনাত পাঁচজন লোক থিতাতে নিহত হোৱাৰ লগতে ৪০ জন আহত হয়।

“আমি নিশ্চিত কৰিব পাৰোঁ যে ৫ জন লোকৰ দুৰ্ঘটনাটোত মৃত্যু হৈছে আৰু ৪০ জন আহত হৈছে। অৱশ্যে, আমি অতিৰিক্ত তথ্য সংগ্ৰহ কৰাৰ লগে লগে এই সংখ্যা সলনি হ’ব পাৰে।” ৱাউকেছা আৰক্ষী বিভাগে তেওঁলোকৰ অফিচিয়েল ফেচবুক পৃষ্ঠাত এক বিবৃতিত কয়।

ঘটনা সন্দৰ্ভত এজন লোকক জিম্মাত লোৱা হৈছে বুলি আৰক্ষীয়ে জানিবলৈ দিয়ে।

আৰক্ষী প্ৰধান ডেন থম্পছনে সাংবাদিকৰ আগত কয়, সমদলটোত যথেষ্ট সংখ্যক শিশু আছিল। দুৰ্ঘটনা সংঘটিত কৰা বাহনখন বিষয়াসকলে উদ্ধাৰ কৰিছে।”

অগ্নি নিৰ্বাপক প্ৰধান ষ্টিভেন হাৱাৰ্ডে সাংবাদিকক জনোৱা মতে মুঠ ১১ জন প্ৰাপ্তবয়স্ক আৰু ১২ টা শিশুক ততাতৈয়াকৈ চিকিৎসালয়লৈ লৈ যোৱা হৈছিল।

Graphic video shows a speeding vehicle ram through participants of the Christmas parade in #Waukesha, Wisc. Few details confirmed at this point though the police said they have a person of interest they’re looking into. pic.twitter.com/zKEX1VoC2T

— Andy Ngô 🏳️‍🌈 (@MrAndyNgo) November 22, 2021

কৰ্তৃপক্ষই জানিবলৈ দিয়া অনুসৰি ঘটনাটোৰ সময়ত এজন বিষয়াই বাহনখন ৰখাবলৈ গুলী চালনা কৰিছিল।

আৰক্ষী প্ৰধান থম্পচনে জনোৱা অনুসৰি তদন্ত অব্যাহত থকাৰ বাবে সোমবাৰে অঞ্চলটোৰ বিদ্যালয়সমূহ আৰু পথসমূহ বন্ধ থাকিব।

ৰাষ্ট্ৰপতি জো বিডেনে পৰিস্থিতি সম্পৰ্কে বুজ লয় আৰু হোৱাইট হাউছে ৱাউকেছাৰ পৰিস্থিতি নিবিড়ভাৱে নিৰীক্ষণ কৰি আছে আৰু এই ভয়ংকৰ ঘটনাৰ দ্বাৰা প্ৰভাৱিত হোৱা সকলোৰে প্ৰতি সহমৰ্মিতা প্ৰকাশ কৰিছে বুলি এজন বিষয়াই কয়।

“আমি প্ৰয়োজন অনুসৰি যিকোনো সমৰ্থন আৰু সহায় আগবঢ়োৱাৰ বাবে ৰাজ্যিক আৰু স্থানীয় বিষয়াসকলৰ সৈতে যোগাযোগ কৰিছো।” বিষয়াজনে লগতে কয়।