মহিলাৰ বিয়াৰ বয়স ২১ বছৰলৈ বৃদ্ধিৰ প্ৰস্তাৱত অনুমোদন কেবিনেটৰ

কেন্দ্ৰীয় কেবিনেটে আজি মহিলাৰ বিবাহৰ আইনী বয়স ২১ বছৰলৈ বৃদ্ধি কৰাৰ প্ৰস্তাৱ গৃহীত কৰিছে।

কেবিনেটৰ অনুমোদনৰ পিছত কেন্দ্ৰীয় চৰকাৰে বাল্য বিবাহ প্ৰতিৰোধ আইন, ২০০৬ আৰু বিশেষ বিবাহ আইন আৰু ব্যক্তিগত আইন যেনে হিন্দু বিবাহ আইন, ১৯৫৫ ৰ সংশোধনৰ প্ৰস্তাৱ উত্থাপন কৰিব।

“মাতৃত্বৰ বয়স, মাতৃ মৃত্যুৰ হাৰ হ্ৰাস কৰাৰ প্ৰয়োজনীয়তা, পুষ্টিৰ স্তৰৰ উন্নতি আৰু সম্পৰ্কিত বিষয়বোৰ পৰীক্ষা কৰিবলৈ গঠন কৰা কেন্দ্ৰৰ টাস্ক ফ’ৰ্চে জয়া জয়তলীৰ নেতৃত্বত ২০২০ চনৰ ডিচেম্বৰত নীতি আয়োগক দাখিল কৰা পৰামৰ্শৰ ওপৰত আধাৰ কৰি এই প্ৰস্তাৱ গ্ৰহণ কৰা হৈছে।

টাস্ক ফ’ৰ্চে লগতে পৰামৰ্শ দিছিল যে মহিলাসকলৰ আইনী বিবাহৰ বয়স বৃদ্ধিৰ সিদ্ধান্তৰ সামাজিক গ্ৰহণযোগ্যতাক উৎসাহিত কৰিবলৈ এক ব্যাপক জনসজাগতা অভিযান চলাব লাগে।

সমিতিখনে ছোৱালীৰ বাবে বিদ্যালয় আৰু বিশ্ববিদ্যালয়সমূহত প্ৰৱেশাধিকাৰ আহ্বান কৰাৰ লগতে দূৰৱৰ্তী এলেকাৰ শৈক্ষিক প্ৰতিষ্ঠানত উপস্থিত থকাৰ ক্ষেত্ৰত পৰিবহন সুবিধাৰ ব্যৱস্থা কৰিবলৈ আহ্বান জনায়।

ইয়াৰ উপৰিও সমিতিখনে যৌন শিক্ষাক আনুষ্ঠানিক ৰূপ দি বিদ্যালয়ৰ পাঠ্যক্ৰমত প্ৰৱৰ্তন কৰাৰ পৰামৰ্শ দিছে। পলিটেকনিক প্ৰতিষ্ঠানত মহিলাৰ প্ৰশিক্ষণ, দক্ষতা আৰু ব্যৱসায়িক প্ৰশিক্ষণ, জীৱিকা বৃদ্ধিৰ পৰামৰ্শ দিয়া হৈছে যাতে বিবাহযোগ্য বয়স বৃদ্ধি কাৰ্যকৰী কৰিব পৰা যায়।

“যদি যুৱতী সকলে দেখুৱাব পাৰে যে তেওঁলোক আৰ্থিকভাৱে স্বতন্ত্ৰ, পিতৃ-মাতৃয়ে তেওঁলোকক সোনকালে বিয়া কৰাৰ আগতে দুবাৰ ভাবিব।” সমিতিখনে এইদৰে কয়।

উল্লেখ্য যে, যোৱা বছৰ স্বাধীনতা দিৱসৰ ভাষণ প্ৰসঙ্গত প্ৰধানমন্ত্ৰী মোদীয়ে মহিলাসকলৰ বিবাহৰ আইনী বয়স বৃদ্ধি কৰাৰ পৰিকল্পনাৰ কথা উল্লেখ কৰিছিল।