আকৌ ভাৰত-পাক যুঁজ! ঘোষিত হ’ল এছিয়া কাপৰ সূচী, ২৮ আগষ্টত পাকিস্তানৰ বিৰুদ্ধে অভিযান আৰম্ভ কৰিব ভাৰতে

পুনৰ এবাৰ ক্ৰিকেটপ্ৰেমীৰ সমুখত ভাৰত-পাকিস্তান মেচৰ উপভোগৰ সুযোগ। পুনৰ এবাৰ ক্ৰিকেট জগতৰ এই হাইপ্ৰফাইল যুঁজ উপভোগ কৰিব বিশ্বৰ অগণন ক্ৰিকেটপ্ৰেমীয়ে।

অহা ২৮ আগষ্টত এছিয়া কাপৰ গ্ৰুপ মেচত প্ৰতিদ্বন্দীৰূপে অৱতীৰ্ণ হ’ব দুই ক্ৰিকেট মহাশক্তি।

মঙ্লবাৰে এছিয়ান ক্ৰিকেট পৰিষদে আগন্তুক এছিয়া কাপ ২০২২ ৰ সময়সূচী ঘোষণা কৰে। এছিয়ান ক্ৰিকেট শক্তি সমূহৰ মাজত হ’বলগীয়া এই প্ৰতিযোগিতাখন ২৭ আগষ্টত আৰম্ভ হ’ব আৰু ১১ ছেপ্টেম্বৰত অন্ত পৰিব।

উল্লেখ্য যে ইয়াৰ পূৰ্বে এছিয়ান ক্ৰিকেট পৰিষদে এছিয়া কাপ শ্ৰীলংকাৰ পৰিৱৰ্তে ইউ.এ.ই.ত আয়োজন কৰিব বুলি ঘোষণা কৰিছিল।

শ্ৰীলংকাত দেখা দিয়া অৰ্থনৈতিক তথা ৰাজনৈতিক সংকটৰ বাবে প্ৰতিযোগিতাখন দ্বীপৰাষ্ট্ৰখনৰ পৰা বাতিল কৰা হয়।

পাকিস্তানৰ বিৰুদ্ধে মেচখনৰ জৰিয়তে ভাৰতে এছিয়া কাপ অভিযান আৰম্ভ কৰিব। এই মেচখনৰ পিছত ভাৰত ৩১ আগষ্টত কোৱালিফায়াৰৰ দলটোৰ বিৰুদ্ধে মুখামুখি হ’ব।

The wait is finally over as the battle for Asian supremacy commences on 27th August with the all-important final on 11th September.

The 15th edition of the Asia Cup will serve as ideal preparation ahead of the ICC T20 World Cup. pic.twitter.com/QfTskWX6RD

— Jay Shah (@JayShah) August 2, 2022

গ্ৰুপ পৰ্যায়ৰ মেচৰ পিছত দুয়োটা গ্ৰুপৰ শীৰ্ষ দুটাকৈ দলে চুপাৰ ৪ পৰ্যায়লৈ উন্নীত হ’ব আৰু ইয়াত জয়ী হোৱা দল দুটাই ১১ ছেপ্টেম্বৰত ফাইনেলত অৱতীৰ্ণ হ’ব।

প্ৰতিযোগিতাখনৰ গ্ৰুপ এ- ত স্থান লাভ কৰিছে ভাৰত আৰু পাকিস্তানে। আনহাতে ইউ এ ই, কুৱেইট, ছিংগাপুৰ আৰু হংকঙৰ মাজত হ’বলগীয়া কোৱালিফায়িং যুঁজত জয়ী হোৱা দলটোৱে গ্ৰুপ এত স্থান লাভ কৰিব।

ইফালে গ্ৰুপ বি- ত স্থান দিয়া হৈছে শ্ৰীলংকা, বাংলাদেশ আৰু আফগানিস্তানক।