ভাৰতীয় ৰিজাৰ্ভ বেঙ্কে Amazon Pay-ক বিহিলে ৩কোটি টকা জৰিমনা; কিন্তু কিয়?

আমাজন পে ইণ্ডিয়াই এক বৃহৎ জৰিমনাৰ সন্মুখীন হ’ব লগা হৈছে। ভাৰতীয় ৰিজাৰ্ভ বেংকে শুকুৰবাৰে অনলাইন পৰিশোধ কোম্পানীটোৰ ওপৰত ৩.০৬ কোটি টকাৰ জৰিমনা আৰোপ কৰিছে। কিন্তু আমাজন পে ইণ্ডিয়া কিয় ইমান ডাঙৰ শাস্তিৰ সন্মুখীন হ’ল?

দিন যোৱাৰ লগে লগে ডিজিটেল পৰিশোধ প্ৰণালী দেশত জনপ্ৰিয় হৈ উঠিছে। ভাৰতীয় ৰিজাৰ্ভ বেঙ্কে ডিজিটেল পেমেণ্ট প্লেটফৰ্মসমূহক কিছুমান নিয়ম মানি চলিবলৈ নিৰ্দেশ দিছে যাতে সাধাৰণ মানুহৰ ধন সুৰক্ষিত থাকে।

কিন্তু অভিযোগ কৰা হৈছে যে আমাজন পে-ই  প্ৰিপেইড পৰিশোধৰ ক্ষেত্ৰত আৰবিআইয়ে দিয়া নিয়ম উলংঘা কৰিছে। কে ৱাই চি (Know Your Customer) নিয়মো অনুসৰণ কৰা হোৱা নাছিল। আৰু সেইকাৰণে তেওঁলোকক বৃহৎ পৰিমাণৰ জৰিমনা বিহা হৈছে।

এক বিজ্ঞপ্তিত ৰিজাৰ্ভ বেংকে জনায়, “ভাৰতীয় ৰিজাৰ্ভ বেঙ্কে আমাজন পে (ইণ্ডিয়া) প্ৰাইভেট লিমিটেডৰ ওপৰত ৩ কোটি ৬ লাখ টকাৰ জৰিমনা আৰোপ কৰিছে। এমাজন পে-ই  ২০২১ৰ ২৭আগষ্ট তাৰিখে প্ৰিপেইড পেমেণ্ট ইনষ্ট্ৰুমেণ্ট (PPI) সম্পৰ্কে জাৰী কৰা নিৰ্দেশনা উলংঘা কৰিছে। কে ৱাই চি নিয়মো অনুসৰণ কৰা হোৱা নাই।‘’

উল্লেখ্য যে ৰিজাৰ্ভ বেংকৰ দ্বাৰা জাৰী কৰা আদেশ কিয় উলংঘা কৰা হৈছে তাৰ উত্তৰ দিবলৈ অনলাইন পেমেণ্ট এপটোক জাননী প্ৰদান কৰা হৈছিল। আমাজন পে ইণ্ডিয়াই ইয়াৰ উত্তৰো দিছিল। তাৰ পিছতে কোম্পানীটোক এইদৰে ৩ কোটি টকাৰো অধিক জৰিমনা বিহা হৈছে।