ব’হাগী উৎসৱৰ মঞ্চত টংলাৰ দৰ্শকক মন্ত্ৰমুগ্ধ কৰিলে কল্পনা পাটোৱাৰীয়ে

নেপথ্য গায়িকা কল্পনা পাটোৱাৰীয়ে সোমবাৰে টংলাত আয়োজন কৰা সদৌ টংলা ব’হাগী উৎসৱত তেওঁৰ যাদুকৰী কণ্ঠেৰে উপস্থিত দৰ্শকসকলক মন্ত্ৰমুগ্ধ কৰি তোলে। টংলা যুৱ মঞ্চই টংলা হাইস্কুল খেলপথাৰত এই উৎসৱৰ আয়োজন কৰিছিল।গায়িকাগৰাকীয়ে ৰংচঙীয়া দখনা পৰিধান কৰিছিল আৰু মধ্যযুগৰ ফৰাছি দেশৰ ট্ৰুবাডু গায়কসকলৰ দৰে মূৰত এখন স্কাৰ্ফ মেৰিয়াই লৈছিল। মা কামাখ্যাৰ প্ৰতি ভক্তি জনাই এটা গীতেৰে তেওঁ তেওঁৰ সাংগীতিক কাৰ্যসূচী আৰম্ভ কৰিছিল গীতেৰে তেওঁ উপস্থিত দৰ্শকক মন্ত্ৰমুগ্ধ কৰি তুলিছিল।

লোকগীতৰ শিল্পীগৰাকীয়ে ৰাজহুৱাভাৱে নাগৰিকত্ব (সংশোধনী) বিধেয়ক-২০১৬ৰ সমালোচনা কৰে আৰু কয় যে ধৰ্মৰ ভিত্তিত প্ৰস্তুত কৰা নাগৰিকত্ব বিধেয়কখনক তেওঁ সমৰ্থন নকৰে।

পাটোৱাৰীয়ে আৰু কয় যে ভাৰতৰ নাগৰিকত্ব আইন-১৯৫৫, চলি থকা ৰাষ্ট্ৰীয় নাগৰিক সঞ্জী আৰু প্ৰস্তাৱিত নাগৰিকত্ব(সংশোধনী)বিধেয়ক-২০১৬কে পৰস্পৰ বিৰোধী হোৱা হেতুকে বিশেষকৈ অসমত নাগৰিকত্ব প্ৰদান কৰাটো এটা জটিল বিষয়।