স্বাতী মালিৱালক যৌন আতিশয্য,শাৰীৰিক আক্ৰমণ; কেজৰিৱালৰ ব্যক্তিগত সচিবৰ বিৰুদ্ধে অভিযোগ

আম আদমি পাৰ্টীৰ ৰাজ্যসভাৰ সদস্য স্বাতী মালিৱালে অৰবিন্দ কেজৰিৱালৰ ব্যক্তিগত সচিবৰ বিৰুদ্ধে প্ৰহাৰ আৰু যৌন নিৰ্যাতনৰ অভিযোগ উত্থাপন কৰিছে।ইতিমধ্যে সেই ঘটনাত দিল্লী আৰক্ষীয়ে গোচৰ ৰুজু কৰিছে। দিল্লীৰ মুখ্যমন্ত্ৰীৰ ব্যক্তিগত সচিব বিভৱ কুমাৰে কেইবাবাৰো প্ৰহাৰ কৰাৰ অভিযোগ স্বাতীয়ে উত্থাপন কৰিছে।

যোৱা মঙলবাৰৰ পৰা এই অভিযোগক লৈ উত্তপ্ত হৈ পৰিছে দিল্লী। ‘ইণ্ডি’ মিত্ৰজোঁটৰ অন্যতম সদস্য কংগ্ৰেছৰ বাহিৰেও বিজেপিৰ কাউন্সিলাৰসকলেকেজৰিৱালৰ পদত্যাগৰ দাবীত হুলস্থুলীয়া পৰিস্থিতিৰ সৃষ্টি কৰে।কিন্তু তেতিয়ালৈকে মালিৱালে নিজে আৰক্ষীৰ ওচৰত কোনো এজাহাৰ দাখিল কৰা নাছিল।অৱশ্যে শুকুৰবাৰে তেওঁ ঠিক তেনেকুৱাই কৰে।

আৰক্ষীৰ সূত্ৰ অনুসৰি বিভৱ কুমাৰে তেওঁৰ বুকু, পেটত ঘোচা মাৰি আনকি লাঠিৰে আঘাত কৰা বুলি অভিযোগ কৰে স্বাতীয়ে। কেৱল সেয়াই নহয়, শৰীৰৰ একাধিক সংবেদনশীল অংশত মৰাৰো অভিযোগ উত্থাপন কৰে। ইতিমধ্যে দিল্লীৰ মুখ্যমন্ত্ৰী অৰবিন্দ কেজৰিৱালৰ চৰকাৰী বাসগৃহত হোৱা অসৎ আচৰণ আৰু হাৰাশাস্তিৰ কথা স্বীকাৰ কৰিছে আপে।

দলটোৰ মতে, সোমবাৰে স্বাতীয়ে মুখ্যমন্ত্ৰীক লগ কৰিবলৈ মুখ্যমন্ত্ৰীৰ ঘৰলৈ গৈছিল। ড্ৰয়িং ৰূমত ৰৈ থকাৰ সময়তে বিভৱে স্বাতীৰ সৈতে অভদ্ৰ ব্যৱহাৰ কৰে। মালিৱালে নিজেই আৰক্ষীক জনাইছিল যে তেওঁ বিভৱক বাৰে বাৰে তেওঁক এৰি দিবলৈ অনুৰোধ কৰিছিল, কিন্তু তেওঁ শুনা নাছিল। ইয়াৰ পাছত স্বাতীয়ে বিভৱৰ বিৰুদ্ধে অভিযোগ দাখিল কৰে।