অসমত নাগৰিকত্ব সংশোধনী আইন ২০১৯ৰ অধীনত অসমত অবৈধভাৱে প্ৰৱেশ কৰা ব্যক্তিৰ নাগৰিকত্ব লাভ – তীব্ৰ ক্ষোভ প্ৰকাশ ৰাইজৰ দলৰ

গুৱাহাটী: অসমত নাগৰিকত্ব সংশোধনী আইন ২০১৯ (CAA)ৰ অধীনত অবৈধভাৱে প্ৰৱেশ কৰা প্ৰথমজন ব্যক্তিয়ে নাগৰিকত্ব লাভ কৰাত তীব্ৰ ক্ষোভ প্ৰকাশ কৰিছে ৰাইজৰ দলে।

দলটোৰ সভাপতি অখিল গগৈ, কাৰ্যকৰী সভাপতি ভাস্ক ডি শইকীয়া আৰু কৱীন্দ্ৰ চেতিয়া ফুকনে এক বিবৃতি যোগে কয়, “নাগৰিকত্ব সংশোধনী আইন ২০১৯ অসমৰ জাতিগত আৰু সাংস্কৃতিক পৰিচয়ৰ ওপৰত এক ভয়ানক ভাবুকি।

অসমৰ জনসাধাৰণৰ তীব্ৰ বিৰোধিতা তথা পাঁচ জনকৈ ছহিদৰ চৰম ত্যাগৰ পিছতো বিজেপি চৰকাৰে সম্পূৰ্ণ স্বেচ্ছাচাৰীতাৰে এই আইনখন বলপূৰ্বক অসমত প্ৰয়োগ কৰিলে। অবৈধভাৱে প্ৰৱেশ কৰা লোকসকলক নাগৰিকত্ব প্ৰদানৰ জৰিয়তে অসমৰ সমাজ জীৱন, সংস্কৃতি আৰু পৰম্পৰা অধিক সংকটৰ সন্মুখীন হ’ব।”

ৰাইজৰ দলৰ নেতৃত্বই কয় “আমি এই সিদ্ধান্তৰ তীব্ৰ প্ৰতিবাদ কৰিছো । আমি অসমৰ স্বকীয়তা আৰু সংস্কৃতি বন্ধকত থৈ বিদেশীৰ বোজা বহন কৰিব নোৱাৰো।”

ৰাইজৰ দলে পুনৰ কয় এই আইন কেৱল অসমবিৰোধীয়ে নহয় ভাৰতৰ সংবিধান আৰু গণতন্ত্ৰৰ প্ৰতিও চৰম ভাবুকি। চৰকাৰে এই আইন আৰু ইয়াৰ প্ৰক্ৰিয়া সম্পূৰ্ণকৈ বাতিল কৰি জনসাধাৰণক গণতান্ত্ৰিক ভাৱে জীয়াই থকাৰ সুবিধা দিয়ক।