যোৰহাট পৌৰসভাৰ দুৰ্নীতিৰ তদন্ত : আজি পৌৰসভাৰ বিষয়া-কৰ্মচাৰীক শুনানিৰ বাবে উন্নয়ন আয়ুক্তৰ কাৰ্যালয়লৈ তলব

যোৰহাট পৌৰসভাত বহু দিনৰ পৰা চলি থকা পুঁজি ব্যয়ৰ অনিয়মক লৈ সংবাদ মাধ্যমত খবৰ প্ৰচাৰ হোৱাৰ পিছত এই বিষয়টো এতিয়া চৰকাৰৰ তদন্তৰ আওতালৈ আহিছে। দুৰ্নীতিৰ কথা অন্যান্য সংবাদ মাধ্যমৰ লগতে নৰ্থ-ইষ্ট নাওৰ বাতৰিতো সবিস্তাৰে প্ৰকাশ হৈছিল।

ইয়াৰে পৰিণামস্বৰূপে মুখ্য মন্ত্ৰীৰ কাৰ্যালয়ৰ পৰা যোৰহাটৰ উপায়ুক্তলৈ বিষয়টো গুৰুত্বসহ ল’বলৈ যোৱা ১৫ মে’ত ই-মেইল যোগে পত্ৰ গৈছিল। তাৰ পাছতে উপায়ুক্তই যোৰহাট জিলা উন্নয়ন আয়ুক্ত ব্ৰজেন চন্দ্ৰ দাসক বিষয়টোৰ তদন্তৰ দায়িত্ব দিয়ে।

উল্লেখযোগ্য যে বিজেপিৰ দখলত থকা যোৰহাট পৌৰ সভাত সংঘটিত হৈ থকা অনিয়মৰ ফলত পৌৰ সভাখন প্ৰায় অচল হোৱাৰ পৰ্য্যায়লৈ গতি কৰা বুলি নৰ্থ-ইষ্ট নাওৰ বাতৰিত প্ৰকাশ পাইছিল। পৌৰ সভাৰ খোদ ৱাৰ্ড কমিশ্যনাৰসকলেই এই শংকা প্ৰকাশ কৰিছিল নৰ্থ-ইষ্ট নাওৰ সাংবাদিকৰ আগত। অভিযোগ মতে, কংগ্ৰেছৰ দিনৰে পৰা, অৰ্থাৎ ইয়াৰ আগৰ কাৰ্য্যকালৰ পৰা এতিয়ালৈকে হোৱা দুৰ্নীতিৰ ফলত পৌৰসভাখনলৈ পুঁজিৰ যোগান বন্ধ হোৱাৰ উপক্ৰম ঘটিছে। সূত্ৰসমূহে জনোৱা মতে ১৩ আৰু ১৪ বিত্তীয় কালৰ প্ৰথম অংশৰ প্ৰায় ৩ কোটি আৰু দ্বিতীয় অংশৰ প্ৰায় ৫ কোটি টকাৰ ব্যয়ৰ প্ৰমাণ পত্ৰ জমা পৌৰসভাই দিবলৈ বাকী আছে।

তাৰোপৰি এতিয়া চলি থকা বিভিন্ন উন্নয়নমূলক কামতো ব্যাপক দুৰ্নীতি হৈ থকাৰ কথা নিৰ্ভৰযোগ্য সূত্ৰসমূহে জানিবলৈ দিছে। এজন অভিযোগকাৰীয়ে কয় যে ট্ৰেইড লাইচেন্সৰ মাচুল, হৰ্ডিঙৰ মাচুল আদিত অনিয়ম, অৱহেলা আৰু দুৰ্নীতি হৈ আছে।

জানিব পৰা মতে, সম্প্ৰতি দুৰ্নীতিৰ তদন্ত কৰি থকা জিলা উন্নয়ন আয়ুক্তই বিজেপিৰ দখলত থকা যোৰহাট পৌৰসভাৰ দুৰ্নীতিৰ  ১৭ মে’ত পৌৰসভাৰ কাৰ্যবাহী বিষয়ালৈ প্ৰেৰণ কৰা এক পত্ৰৰ জৰিয়তে পৌৰসভাৰ বিষয়া-কৰ্মচাৰীসকলক ২৩ মে’ৰ পুৱা ১০.৩০ বজাত জিলা উন্নয়ন আয়ুক্তৰ কাৰ্যালয়ত অনুষ্ঠিত হ’ব লগা শুনানিত উপস্থিত থাকিবলৈ নিৰ্দেশ দিছে।

যোৰহাটৰ সচেতন নাগৰিকে পৌৰসভাৰ দুৰ্নীতিৰ তদন্ত হোৱাত আনন্দ প্ৰকাশ কৰিছে আৰু অপৰাধীৰ বিৰুদ্ধে খৰতকীয়াকৈ আইনী ব্যৱস্থা লোৱাটো বিচাৰিছে।