যুদ্ধভূমি লেবানন! ইজৰাইলৰ আক্ৰমণত নিহতৰ সংখ্যা ২০০০ অতিক্ৰম, গৃহহীন লাখ লাখ লোক

ইজৰাইলী বাহিনীয়ে লেবাননৰ ভূখণ্ডত কেইবা সপ্তাহ ধৰি চলোৱা নিৰ্বিচাৰ আক্ৰমণত নিহত লোকৰ সংখ্যা ২ হাজাৰ অতিক্ৰম কৰিছে। দেশৰ স্বাস্থ্য মন্ত্ৰালয়ে এই তথ্য সদৰী কৰিছে।

শুকুৰবাৰে লেবাননৰ স্বাস্থ্য মন্ত্ৰালয়ে প্ৰকাশ কৰা অনুসৰি পূৰ্বৰ ২৪ ঘণ্টাত ইজৰাইলৰ আক্ৰমণত কমেও ৩৭ জন লোক নিহত হৈছে। আহতৰ সংখ্যা ১৫১ জন। ইয়াৰ লগে লগে ১৭ ছেপ্টেম্বৰৰ পৰা সমগ্ৰ লেবাননত ইজৰাইলী আক্ৰমণত নিহত লোকৰ সংখ্যা ২০০০ অতিক্ৰম কৰিছে। ইয়াৰে ২৬১ গৰাকী মহিলা আৰু ১২৭ গৰাকী শিশু।

যোৱা নিশা ইজৰাইলৰ বাহিনীয়ে ৰাজধানী বেইৰুটৰ দক্ষিণ উপকণ্ঠ অঞ্চলত আক্ৰমণ কৰে। ইজৰাইলে লেবাননৰ দক্ষিণ সীমান্ত অঞ্চলত বিমান আক্ৰমণৰ উপৰিও স্থল অভিযানো চলাইছে।

লগতে পঢ়কঃ প্ৰেমিকক গছত বান্ধি থৈ যুৱতীক দলবদ্ধ ধৰ্ষণ! পুনেত ভয়ংকৰ ঘটনা

ইজৰাইলৰ আক্ৰমণৰ ফলত লেবাননত ১২ লাখতকৈ অধিক লোক শৰণাৰ্থী হৈ পৰিছে। ৰাজধানী বেইৰুটৰ হাজাৰ হাজাৰ সাধাৰণ নাগৰিকে অব্যাহত থকা বিমান আক্ৰমণৰ সন্মুখীন হৈ নিৰাপদ আশ্ৰয় বিচাৰি ঘৰ এৰি পলায়ন কৰিছে।