লণ্ডনৰ হিথ্ৰ’ বিমানবন্দৰ বন্ধ ঘোষণা; ঘূৰাই পঠোৱা হ’ল শতাধিক বিমান

শুকুৰবাৰে গোটেই দিনটো বন্ধ থাকিব লণ্ডনৰ হিথ্ৰ’ বিমানবন্দৰ। বিমানবন্দৰৰ সমীপৰ এটা বৈদ্যুতিক উপকেন্দ্ৰত অগ্নিকাণ্ডৰ ফলত বিদ্যুৎ বিচ্ছিন্ন হোৱাৰ বাবেই কৰ্তৃপক্ষই এই সিদ্ধান্ত গ্ৰহণ কৰে।

জানিব পৰা মতে, অগ্নিকাণ্ডৰ ফলত বিদ্যুৎ বিচ্ছিন্ন হোৱাৰ বাবে এশৰো অধিক বিমান ঘূৰাই পঠোৱা হৈছে।

হিথ্ৰ’ কৰ্তৃপক্ষৰ এক বিবৃতিত কোৱা হৈছে যে জুইৰ বাবে বিমানবন্দৰটোত “উল্লেখযোগ্য বিদ্যুৎ বিচ্ছিন্ন” হৈছে। আমাৰ যাত্ৰী আৰু সহকৰ্মীসকলৰ সুৰক্ষা বজাই ৰাখিবলৈ ২১ মাৰ্চৰ নিশা ১১:৫৯ বজালৈকে হিথ্ৰ’ বিমানবন্দৰ বন্ধ থাকিব। এই সময়ছোৱাত যাত্ৰীসকলক বিমানবন্দৰলৈ নাযাবলৈ পৰামৰ্শ দিয়া হৈছে।

হিথ্ৰ’ কৰ্তৃপক্ষই কয় যে যাত্ৰীসকলে অধিক তথ্যৰ বাবে বিমান সংস্থাটোৰ সৈতে যোগাযোগ কৰিব পাৰে। এই সাময়িক অসুবিধাৰ বাবে আমি ক্ষমা বিচাৰিছো।

উল্লেখ্য যে হিথ্ৰ’ ব্ৰিটেইনৰ সৰ্ববৃহৎ বিমানবন্দৰ য’ত প্ৰতিদিনে প্ৰায় ১৩০০খন বিমান উৰণ আৰু অৱতৰণ কৰে। যোৱা বছৰ এই বিমানবন্দৰৰ টাৰ্মিনেলৰ জৰিয়তে অভিলেখ সংখ্যক ৮ কোটি ৩৯ লাখ যাত্ৰীয়ে যাত্ৰা কৰিছিল।