হংকঙ, ছিংগাপুৰত পুনৰ কৰ’নাৰ সংক্ৰমণ, বহু জনৰ মৃত্যু, হাস্পাতালত বাঢ়িছে ভিৰ; ভাৰতত কি পৰিস্থিতি?

হংকং আৰু ছিংগাপুৰৰ বহু লোক পুনৰ কৰ’নাত আক্ৰান্ত হৈছে। স্থানীয় প্ৰশাসনে জানিবলৈ দিছে যে সংক্ৰমণ দ্ৰুতগতিত বৃদ্ধি পাইছে। বিগত কিছুদিনত হংকঙত ৩০ জন লোকৰ মৃত্যু হৈছে।

হংকঙৰ চেণ্টাৰ ফৰ হেল্থ প্ৰটেকচনৰ সংক্ৰামক ৰোগ বিশেষজ্ঞ এলবাৰ্টে কয় যে এই সংক্ৰমণ দ্ৰুতগতিত বিয়পি পৰিছে। মহানগৰীৰ বৃহৎ জনসংখ্যা আৰু ঘন বসতিয়ে এই চিন্তা আৰু অধিক বৃদ্ধি কৰিছে।

মহানগৰীখনৰ ৭০ লাখ বাসিন্দাৰ অধিকাংশ লোকে টিকাকৰণ কৰিছে। তাৰপিছতো কৰ’না সংক্ৰমণৰ কাৰণ বুজিব পৰা নাই। চীন চৰকাৰে চিকিৎসালয়ত চিকিৎসাধীন হৈ থকা ৰোগীৰ নমুনা পৰীক্ষা কৰি সংক্ৰমণ বিয়পিছে নে নাই সেইটো নিৰ্ণয় কৰি আছে। হংকং আৰু ছিংগাপুৰত সংক্ৰমণ বিয়পি পৰাত চীনৰ স্বাস্থ্য বিভাগে পৰীক্ষাৰ হাৰ দুগুণলৈ বৃদ্ধি কৰিছে।

ভাৰতৰ পৰিস্থিতি কেনেকুৱা? স্বাস্থ্য মন্ত্ৰালয়ে কয় যে এই মুহূৰ্তত দেশত কৰ’নাৰ কোনো বিপদ নাই। মহামাৰীৰ পৰিস্থিতিৰ সৃষ্টি হোৱা নাই। সমগ্ৰ দেশত মাত্ৰ ৭৫ গৰাকী কৰ’না আক্ৰান্ত লোক চিকিৎসাধীন হৈ আছে।

শুকুৰবাৰে হংকঙৰ স্বাস্থ্য বিভাগে প্ৰকাশ কৰা এক প্ৰতিবেদনত কোৱা হৈছে যে পূৰ্বৰ সপ্তাহৰ তুলনাত ২৮ শতাংশতকৈ অধিক সংক্ৰমণ বৃদ্ধি পাইছে। চিকিৎসালয়ত ভৰ্তি হোৱাৰ হাৰ ৩০ শতাংশ বৃদ্ধি পাইছে। আক্ৰান্তৰ সংখ্যা ১৪,২০০ জন। আক্ৰান্তসকলৰ ভিতৰত আছে টাইৱান-হংকঙৰ জনপ্ৰিয় সংগীত শিল্পী ইছন চেন।

ছিংগাপুৰৰ বিশেষজ্ঞসকলৰ মতে, এই নতুন সংক্ৰমণ কৰ’না ভাইৰাছৰ নতুন ৰূপ নহয়। তেওঁলোকৰ মতে সংক্ৰমণৰ অন্যতম কাৰণ হ’ল মানুহৰ ৰোগ প্ৰতিৰোধ ক্ষমতা হ্ৰাস।