নগাঁও মহাবিদ্যালয়ৰ মহাৰজত জয়ন্তীত চাৰি কিলোমিটাৰ জোৰা বৰ্ণাঢ্য সাংস্কৃতিক শোভাযাত্ৰা

নগাঁও মহাবিদ্যালয়ৰ মহাৰজত জয়ন্তী উপলক্ষে শনিবাৰে নগাঁও চহৰৰ নেহৰুবালিৰ পৰা এক বৰ্ণাঢ্য সাংস্কৃতিক শোভাযাত্ৰা উলিওৱা হয়। শোভাযাত্ৰা উদ্বোধন কৰে প্ৰাক্তন ছাত্ৰ তথা বিশিষ্ট সাংবাদিক মনোজ কুমাৰ গোস্বামীয়ে।

শোভাযাত্ৰা উদ্বোধন কৰি তেওঁ কয় যে সকলোৱে কলঙক মৃত বুলি কয়। কিন্তু নগাঁও মহাবিদ্যালয়ৰ মহাৰজত জয়ন্তীৰ আজিৰ এই ৰং ৰহইচ আৰু বৰ্ণাঢ্য প্ৰস্তুতি দেখি মোৰ বিশ্বাস এই কলং পুনৰ জী উঠিব।এসময়ৰ দেৱকান্ত বৰুৱা আৰু নৱকান্ত বৰুৱাৰ কলঙক আমি জীয়াই তুলিব পাৰিম।

গোস্বামীয়ে লগতে কয় যে নগাঁও মহাবিদ্যালয়ে বিগত সময়ত পটু ৰাজনীতিবিদ, প্ৰসিদ্ধ শিক্ষাবিদ, বিজ্ঞানী আদি সৃষ্টি কৰিছে। সেয়ে ছাত্ৰ-ছাত্ৰী সকলে নগাঁও মহাবিদ্যালয়তে নিজৰ আদৰ্শৰ উৎস বিচাৰি পাব। নগাঁৱৰ পুৰণি ঐতিহ্য পুনৰ সজীৱ হৈ উঠিব।

সাংস্কৃতিক শোভাযাত্ৰাত বিধায়ক ৰূপক শৰ্মা, প্ৰাক্তন মুখ্য মন্ত্ৰী প্ৰফুল্ল কুমাৰ মহন্ত, প্ৰাক্তন মন্ত্ৰী গিৰীন্দ্ৰ কুমাৰ বৰুৱা, অভিনেতা যতীন বৰাইয়ো অংশগ্ৰহণ কৰে। আনহাতে, মহাপুৰুষ শ্ৰীমন্ত শংকৰদেৱৰ বৈষ্ণৱ কৃষ্টি-সংস্কৃতিৰ পৰা আৰম্ভ কৰি অসম তথা উত্তৰ-পূৰ্বাঞ্চলৰ বিভিন্ন জনগোষ্ঠীয় কৃষ্টি-সংস্কৃতি, ভাৰতৰ স্বাধীনতা আন্দোলন, অসমৰ জাতীয় আন্দোলন, অসমৰ বীৰ-বীৰাংগনাৰ কৃতীকে ধৰি বিভিন্ন প্ৰতীক প্ৰদৰ্শন কৰা হয়।

প্ৰায় চাৰি কিলোমিটাৰ দৈৰ্ঘ্যৰ এই বৰ্ণাঢ্য শোভাযাত্ৰাত নগাঁও মহাবিদ্যালয়ৰ ছাত্ৰ-ছাত্ৰী, অধ্যাপক-অধ্যাপিকা, অৱসৰ প্ৰাপ্ত অধ্যাপক-অধ্যাপিকা, প্ৰাক্তন ছাত্ৰ-ছাত্ৰীকে ধৰি ভালেসংখ্যক শুভাকাংক্ষীয়ে অংশগ্ৰহণ কৰে।

ইপিনে মহাৰজত জয়ন্তীৰ শনিবাৰে পঞ্চম দিনা ”প্ৰাক্তন ছাত্ৰ-ছাত্ৰী সমাৰোহত” বিশিষ্ট অতিথিৰূপে অংশ গ্ৰহণ কৰি ৰাজ্যৰ স্বাস্থ্য, গড়কাপ্তানি মন্ত্ৰী হিমন্ত বিশ্ব শৰ্মাই কয় যে প্ৰাচীন ভাৰতবৰ্ষ বিশ্বৰ গুৰু আছিল। ইয়াৰ মূলতেই আছিল তক্ষশীলা আৰু নালন্দা বিশ্ববিদ্যালয়। এই দুখন বিশ্ববিদ্যালয়ে শিক্ষাৰ গুৰি ধৰাৰ বাবেই ভাৰতবৰ্ষই বিশ্বত প্ৰভাৱশালী দেশ হিচাপে গুৰুত্ব লাভ কৰিছিল। কিন্তু পিছত তক্ষশীলা আৰু নালন্দা বিশ্ববিদ্যালয় লুপ্ত হয়। পশ্চিমৰ দেশত প্ৰতিষ্ঠা হয় অক্সফোৰ্ড আৰু হাভাৰ্ড বিশ্ববিদ্যালয়। ইয়াৰ লগে লগে শিক্ষাৰ গতি পশ্চিমীয়া দেশলৈ গতি কৰে। ভাৰতবৰ্ষৰ পৰিবৰ্তে বিশ্বৰ নেতৃত্ব পশ্চিমীয়া দেশলৈ স্থানান্তৰিত হয়।

নগাঁও মহাবিদ্যালয়ৰ গৌৰৱ উজ্জ্বল ঐতিহ্যৰ কথা উল্লেখ কৰি তেওঁ কয় যে, ৭৫ বছৰ অতিক্ৰমণ কৰাৰ পিছত মহাবিদ্যালয়খনৰ দায়িত্ব আৰু বাহিল। এনে সময়ত মহাবিদ্যালয়খনে যাতে দায়িত্বৰ পৰা আঁ‌তৰি নাযায় তাৰ সংকল্প ল’ব লাগিব। অগ্ৰজসকলে দি যোৱা গৌৰৱ ৰাখিব পাৰিছোনে নাই সেই কথাও চিন্তা কৰিব লাগিব। লক্ষ্মীনাথ বেজবৰুৱাকে ধৰি বিশিষ্ট ব্যক্তি সকলৰ উৰ্দ্ধমুখী যাত্ৰাক আমি ধৰি ৰাখিব লাগিব।

সমাৰোহত অংশগ্ৰহণ কৰি মহাৰজত জয়ন্তী উদযাপন সমিতিৰ সভাপতি তথা নগাঁৱৰ বিধায়ক ৰূপক শৰ্মাই সাহিত্য-সংস্কৃতি-ৰাজনীতি সকলো ক্ষেত্ৰলৈ অৱদান আগবঢ়োৱাৰ কথা উল্লেখ কৰে। সমাৰোহত বিশিষ্ট অভিনেতা যতীন বৰাই অংশগ্ৰহণ কৰি কয় যে ছাত্ৰ-ছাত্ৰী সকলে প্ৰথমে মানুহ হোৱাৰ শিক্ষা গ্ৰহণ কৰক।পিতৃ-মাতৃ শিক্ষকক ভগৱানৰ দৰে জ্ঞান কৰক। সাংবাদিক সুনীল বৰাই আঁত ধৰা সভাখনত ডি ৱাই ৩৬৫ চেনেলৰ মুখ্য সম্পাদক মনোজ গোস্বামীয়েও ভাষণ দিয়ে। সমাৰোহৰ আদৰণী ভাষণ দিয়ে নগাঁও মহাবিদ্যালয়ৰ অধ্যক্ষ ডঃ শৰৎ বৰকটকীয়ে। সমাৰোহত মহাবিদ্যালয় পৰিচালনা সমিতিৰ সভাপতি আলিমুজ জামান উপস্থিত থাকে ৷