ৰীমা দাসৰ ‘ভিলেজ ৰকষ্টাৰ্ছ’লৈ ৫০ লাখ টকাৰ আৰ্থিক সাহায্য অসম চৰকাৰৰ

অস্কাৰৰ বিদেশী ভাষা চলচ্চিত্ৰৰ শিতানত প্ৰতিদ্বন্দিতাৰ বাবে নিৰ্বাচিত হোৱা ‘ভিলেজ ৰকষ্টাৰ্ছ’ৰ পৰিচালক ৰীমা দাসলৈ ৫০ লাখ টকাৰ আৰ্থিক সাহায্য আগবঢ়াব অসম চৰকাৰে।

চলচ্চিত্ৰখনৰ প্ৰমোচনৰ বাবে আজি মুখ্যমন্ত্ৰী সৰ্বানন্দ সোণোৱালৰ নেতৃত্বত অনুষ্ঠিত কেবিনেট বৈঠক চৰকাৰে এই সিদ্ধান্ত গ্ৰহণ কৰে। ইয়াৰ উপৰিও অহা ২৮ ছেপ্তেম্বৰত অসমৰ ছবিগৃহলৈ আহিব লগা ভিলেইজ ৰকষ্টাৰছ’ৰ ৫০ শতাংশ আমোদ কৰ ৰেহাইৰ ঘোষণা কৰে চৰকাৰে।

উল্লেখযোগ্য যে ৰীমা দাসৰ বহু প্ৰশংসিত ‘ভিলেজ ৰকষ্টাৰ্ছ’ক যোৱা ২২ ছেপ্তেম্বৰত দেশৰ ২৮খন চলচ্চিত্ৰৰ মাজৰ পৰা অস্কাৰৰ বিদেশী ভাষা চলচ্চিত্ৰৰ শিতানত প্ৰতিদ্বন্দিতাৰ বাবে নিৰ্বাচিত কৰা হয়।

চলচ্চিত্ৰখনক ফিল্ম ফেডাৰেশ্যন অব ইণ্ডিয়াৰ ১২জনীয়া সদস্যৰ কমিটীখনে আনুষ্ঠানিকভাৱে অস্কাৰলৈ অপ্ৰতিদ্বন্দ্বিতামূলকভাৱে নিৰ্বাচিত কৰিছে।