‘হলা গছত বাগি কুঠাৰ!’ ৫খন ৰাজ্যৰ নিৰ্বাচনৰ ফলাফালৰ পিছতে বিজেপিক সকীয়ালে অগপৰ সভাপতিয়ে

নাগৰিকত্ব সংশোধনী বিধেয়কক কেন্দ্ৰ কৰি মিত্ৰ দল অগপ-বিজেপিৰ মাজত সংঘাত অব্যাহত থকাৰ মাজতে ১১ ডিচেম্বৰত ফলাফল ঘোষিত ৫খন ৰাজ্যৰ নিৰ্বাচনত মুখ থেকেচা খোৱা বিজেপি মিত্ৰ দলটোক অধিক কঠোৰভাৱে সকীয়াই দিয়ে অগপৰ সভাপতি অতুল বৰাই।

সংবাদমাধ্যম লৈ প্ৰেৰণ কৰা এটা প্ৰেছ বিবৃতিত অগপৰ সভাপতিগৰাকীয়ে ক’লে, “জনমতক উপেক্ষা কৰিলে ফলাফল কি হ’ব পাৰে এই নিৰ্বাচনে পুনৰ স্পষ্ট কৰিলে।”

যদিও পোনপটীয়াকৈ বিজেপিৰ নাম উল্লেখ কৰা নাই, বাক্যশাৰীৰ লক্ষ্য কোন সেয়া স্পষ্ট হৈ পৰিছে। অগপৰ সভাপতিজনে বিবৃতিটোত অসমৰ ৰাইজ আৰু মিত্ৰ দল অগপকে ধৰি বিভিন্ন দল-সংগঠনে নাগৰিকত্ব সংশোধনী বিধেয়কৰ বিৰুদ্ধে কৰি অহা প্ৰতিবাদ আৰু আন্দোলনবোৰক গুৰুত্ব নিদিলে যে বিজেপিয়ে অনুৰূপ ফলাফল ভৱিষ্যতেও পাব তাকে ইংগিত কৰিছে।

উল্লেখ্য যে, নাগৰিকত্ব সংশোধনী বিধেয়কৰ বিষয়ত অগপ মিত্ৰ দল বিজেপিৰ সৈতে সংঘাত আৰম্ভ হৈছিল আৰু পঞ্চায়ত নিৰ্বাচনৰ সময়ত সেয়া অধিক প্ৰকট হৈ পৰিছিল। আপাতত দুয়োটা মিত্ৰদল এতিয়া দুই মেৰুত।

ইফালে নাগৰিকত্ব সংশোধীন বিধেয়কখন বাতিলৰ দাবীত অসমত গঠিত হৈছে প্ৰৱল জনমত। তাৰ পিছতো বিজেপিয়ে এইবোৰৰ প্ৰতি অলপো কাণসাৰ কৰা নাই।

গতিকে অতুল বৰাই এই বিবৃতিযোগে ৫খন ৰাজ্যৰ বিধানসভাৰ নিৰ্বাচনৰ ফলাফলে যে বিজেপিলৈ বিপদৰ সংকেত দিছে আৰু ৰাইজৰ গণতান্ত্ৰিক প্ৰতিবাদ-আন্দোলনৰ প্ৰতি গুৰুত্ব দিয়া উচিত সেই কথা সকীয়াই দিছে।

ইয়াৰ উপৰি বিবৃতিটোত ৫খন ৰাজ্যৰ ফলাফলত মিজোৰাম আৰু তেলেংগানাৰ নিৰ্বাচনত আঞ্চলিক দলে নিৰংকুশ সংখ্যা গৰিষ্ঠতা লাভ কৰাত সন্তুষ্টি ব্যক্ত কৰি তেওঁ ইয়াক “গণতন্ত্ৰৰ বিজয়” আখ্যা দিয়ে।

“দেশৰ ৰাজনীতিত অঞ্চলিকতাবাদৰ প্ৰাসংগিকতা বৃদ্ধি পাইছে আৰু পৰৱৰ্তী নিৰ্বাচনসমূহত ই দিক নিৰ্ণয় কৰিব” সভাপতি অতুল বৰাৰ মত। উল্লেখ কৰিব পাৰি যে ১০ ডিচেম্বৰ দিনাও অগপ আন এজন শীৰ্ষ নেতা তথা প্ৰাক্তন মুখ্য মন্ত্ৰী প্রফুল্ল কুমাৰ মহন্তয়ো আঞ্চলিক দলেহে অসমৰ সমস্যাবিলাক সমাধান কৰিব পাৰিব বুলি সংবাদ মাধ্যমৰ আগত মন্তব্য কৰিছিল।