লোকসভাত সাংসদ ৰমেন ডেকাৰ দাবী : শীঘ্ৰে আৰম্ভ কৰক নাৰেংগী-কুৰুৱা সংযোগী দলঙৰ কাম

অসমৰ যোগাযোগ ব্যৱস্থা ত্বৰাণ্বিত কৰাৰ উদ্দেশ্যে দৰং জিলাৰ কুৰুৱা আৰু গুৱাহাটীৰ নাৰেংগীক সংযোগ কৰি ব্ৰহ্মপুত্ৰত এখন দলং নিৰ্মাণৰ প্ৰস্তাৱ গ্ৰহণ কৰা হৈছিল। প্ৰস্তাৱ গ্ৰহণৰ পিছতো আজি পৰ্যন্ত নিৰ্মাণৰ বাবে একো ব্যৱস্থা গ্ৰহণ নকৰাত দলংখনৰ কাম শীঘ্ৰে আৰম্ভ কৰিব লাগে বুলি বুধবাৰে লোকসভাত দাবী উত্থাপন কৰে মঙলদৈৰ সাংসদ ৰমেন ডেকাই।

উল্লেখ্য যে ব্ৰহ্মপুত্ৰৰ উত্তৰ পাৰৰ যোগাযোগ ব্যৱস্থা আজিও বহু পিছপৰি থকা বুলি প্ৰকাশ কৰি সাংসদ ডেকাই উল্লেখ কৰে যে ব্ৰহ্মপুত্ৰৰ উত্তৰ পাৰৰ ৰাইজৰ উন্নয়নৰ স্বাৰ্থত প্ৰস্তাৱিত উক্ত দলংখনৰ কাম শীঘ্ৰে আৰম্ভ কৰিব লাগে।

মন কৰিবলগীয়া যে বহু দিনৰে পৰা অসমৰ বিভিন্ন জাতীয় দল-সংগঠনসমূহে উক্ত দলংখনৰ নিৰ্মাণৰ বাবে দাবী জনাই আহিছে। তদুপৰি ২০১৬ চনত দায়িত্বভাৰ গ্ৰহণ কৰা মুখ্যমন্ত্ৰী সৰ্বানন্দ সোণোৱালৰ নেতৃত্বাধীন বিজেপি চৰকাৰেও নাৰেংগী-কুৰুৱা সংযোগী দলংখনৰ নিৰ্মাণ কাৰ্য শীঘ্ৰে আৰম্ভ কৰা হ’ব বুলি প্ৰকাশ কৰিছিল।

ইয়াৰ উপৰি ৰাজ্য চৰকাৰে উক্ত দলংখনৰ বাবে বিস্তাৰিত প্ৰকল্প প্ৰতিবেদন প্ৰস্তুত কৰাৰ লগতে ২২৫৫ কোটি টকা ব্যয় সাপেক্ষে ছয়লেনযুক্ত দলংখন নিৰ্মাণ হ’ব বুলিও প্ৰকাশ কৰিছিল।

কিন্তু ইমানৰ পাছতো আজিলৈ ৰাজ্য চৰকাৰে হওঁক বাব কেন্দ্ৰীয় চৰকাৰে হওঁক কিয় দলংখনৰ নিৰ্মাণৰ কাম আৰম্ভ কৰাত তৎপৰতা প্ৰদৰ্শন কৰা নাই সেয়ে বিষয়টো সাংসদ ডেকাই বুধবাৰে লোক সভাত উত্থাপন কৰা পৰিলক্ষিত হয়।