টেপেছিয়াত চাৰিদিনীয়া কাৰ্যসূচীৰে আৰম্ভ ৰাষ্ট্ৰীয় জনজাতি ক্ৰীড়া সমাৰোহ

আজিৰ পৰা গুৱাহাটীৰ সমীপৱৰ্তী সোণাপুৰ টেপেছিয়া লক্ষ্মীবাঈ শাৰীৰিক শৈক্ষিক প্ৰতিষ্ঠানৰ প্ৰাংগণত আৰম্ভ হ’ব ২১ সংখ্যক ৰাষ্ট্ৰীয় জনজাতি ক্ৰীড়া সমাৰোহ। অখিল ভাৰতীয় বনবাসী কল্যাণ আশ্ৰমৰ উদ্যোগত আয়োজন কৰা হৈছে এই ক্ৰীড়া সমাৰোহখন। 

অহা চাৰিদিনলৈ চলিবলগীয়া এই সমাৰোহত অংশ লোৱাৰ উদ্দেশ্যে ইতিমধ্যে বুধবাৰতে টেপেছিয়াৰ ক্ৰীড়া প্ৰাংগণত আহি উপস্থিত হৈছেহি দেশৰ ৩৭খন ৰাজ্যৰ প্ৰায় এশ জনগোষ্ঠীৰ ১২০০ প্ৰতিযোগী।

উল্লেখ্য যে ক্ৰীড়া সমাৰোহৰ শুভাৰম্ভণী অনুষ্ঠানত মুখ্য অতিথি হিচাপে কেন্দ্ৰীয় ৰে’ল মন্ত্ৰী পীয়ূষ গোৱেল, কেন্দ্ৰীয় জনজাতি উন্নয়ন দপ্তৰৰ মন্ত্ৰী জুয়েল অ’ৰামৰ লগতে অসমৰ মুখ্য মন্ত্ৰী সৰ্বানন্দ সোণোৱালো অতিথি হিচাপে উপস্থিত থাকিব বুলি জানিব পৰা গৈছে।

আনহাতে ২৬ ডিচেম্বৰৰ সন্ধিয়া পাঁচ বজাত সমাৰোহৰ লগত সংগতি ৰাখি স্থানীয় পৰম্পৰাগত ক্ৰীড়াৰ এক বিশেষ প্ৰদৰ্শনীৰ অনুষ্ঠিত কৰা হয়। এই প্ৰদৰ্শনীৰ শুভাৰম্ভ কৰে অখিল ভাৰতীয় বনবাসী কল্যাণ আশ্ৰমৰ ৰাষ্ট্ৰীয় সভাপতি জগদীও ৰাম ওৰাম আৰু ৰাষ্ট্ৰীয় স্বয়ংসেৱক সংঘৰ যুটীয়া সাধাৰণ সম্পাদক এছ জি ছোনীয়ে।

উল্লেখ্য যে এই ক্ৰীড়া সমাৰোহত ১৪, ১৭ আৰু ২১ অনূৰ্ধ্বৰ ল’ৰা আৰু ছোৱালী খেলুৱৈৰ বাবে অনুষ্ঠিত হ’ব এথলেটিকছ, মাৰাথন দৌৰ, লংজাম্প, থ্ৰ’ ইভেণ্ট, আৰ্চাৰী। তদুপৰি পৰম্পৰাগত খেলবোৰৰো প্ৰদৰ্শনী কৰা হ’ব।