ৰাজ্যৰ ৮০০ গৰাকী দিব্যাংগক চৰকাৰী পদত নিযুক্তিৰ বাবে অচিৰেই প্ৰকাশ পাব বিজ্ঞাপন

ৰাজ্য চৰকাৰৰ বিভিন্ন বিভাগৰ অধীনত দিব্যাংগসকলৰ বাবে ৮০০তকৈও অধিক পদ পূৰণৰ বাবে অচিৰেই বিজ্ঞাপন প্ৰকাশ পাব। বৃহস্পতিবাৰে শংকৰদেৱ কলাক্ষেত্ৰত সমাজ কল্যাণ বিভাগৰ দীনদয়াল দিব্যাংগজন পেঞ্চন আঁচনিৰ শুভাৰম্ভ কৰি মুখ্য মন্ত্ৰী সোণোৱালে এই কথা ঘোষণা কৰে।

সমাজকল্যাণ বিভাগৰ এই আঁচনিয়ে ৰাজ্যখনৰ সৰ্বমুঠ ১,১৫,১১১গৰাকী দিব্যাংগক সামৰি ল’ব। আঁচনিখনে সামৰি লোৱা দিব্যাংগসকলে প্ৰতিমাহে ১০০০ টকাৰ ভাত্তা লাভ কৰিব। তদুপৰি, আঁচনিখনে দিব্যাংগসকলক মৰ্যাদা সহকাৰে জীৱন নিৰ্বাহত সহায় কৰাত অৰিহণা যোগাব বুলিও মুখ্য মন্ত্ৰী সোণোৱালে উল্লেখ কৰে।

অনুষ্ঠানত ১৩গৰাকী দিব্যাংগ হিতাধিকাৰীক এই আঁচনিৰ চে’ক মুখ্য মন্ত্ৰীয়ে আনুষ্ঠানিকভাৱে বিতৰণ কৰে। অনুষ্ঠানত সমাজ কল্যাণ মন্ত্ৰী প্ৰমীলা ৰাণী ব্ৰহ্মই দিব্যাংগসকলৰ বাবে খালী হৈ থকা বেকলগ পদসমূহ পূৰণৰ বাবে ৰাজ্য চৰকাৰে প্ৰয়োজনীয় পদক্ষেপ লোৱা বুলি জানিব দিয়ে।

উল্লেখযোগ্য যে ৰাজ্যখনৰ দিব্যাংগসকলক চৰকাৰে বঞ্চিত কৰি অহাৰ প্ৰতিবাদত কিছুদিন পূৰ্বে দিব্যাংগসকলে প্ৰতিবাদী কাৰ্যসূচী গ্ৰহণ কৰিছিল। উক্ত প্ৰতিবাদৰ অংশ হিচাপে দিচপুৰৰ জনতা ভৱনৰ সন্মুখত প্ৰতিবাদ কৰা দিব্যাংগসকলৰ ওপৰত আৰক্ষীয়ে নিৰ্মমভাৱে লাঠীচালনা কৰাৰ পাছত সৰ্বত্ৰ প্ৰতিক্ৰিয়াৰ সৃষ্টি হৈছিল।