মঙলদৈ বিধানসভা সমষ্টিত জনপ্রিয়তা হেৰুৱাইছে বিজেপিয়ে : ৰাজ্যিক সভাপতি ৰঞ্জিত দাস

মঙলদৈ বিধানসভা সমষ্টিৰ অন্তৰ্গত ধূলাত বৃহস্পতিবাৰে বিয়লি এখন নিৰ্বাচনী সভাত দিয়া ভাষণত বিজেপিৰ ৰাজ্যিক সভাপতি ৰঞ্জিত দাসে নিজেই যোৱাটো বিধানসভাৰ নিৰ্বাচনৰ তুলনাত বৰ্তমান গেৰুৱা দলটোৱে যে জনপ্ৰিয়তা হেৰুৱাইছে সেয়া স্বীকাৰ কৰে।

মঙলদৈ লোকসভা সমষ্টিত বিজেপি প্ৰাৰ্থীগৰাকীৰ বিজয়ৰ সম্ভাৱনা সন্দৰ্ভত দলৰ এক প্ৰাক্ নিৰ্বাচনী সমীক্ষাৰ কথা উল্লেখ কৰি মঙলদৈ সমষ্টিৰ বিধায়ক গুৰুজ্যোতি দাস আৰু আন দলীয় নেতাৰ সন্মুখতে ৰাজ্যিক সভাপতিগৰাকীয়ে প্ৰকাশ কৰে যে তেওঁলোকৰ দলৰ প্ৰাৰ্থীগৰাকীয়ে ইয়াত প্ৰতিদ্বন্দ্বী কংগ্ৰেছৰ প্ৰাৰ্থীগৰাকীতকৈ ২০,০০০ ভোটত আগবাঢ়ি আছে।

এইদৰে ৰাজ্যিক সভাপতিগৰাকীৰ ভাষ্যই প্ৰমান কৰে যে দলটোৰ যোৱা বিধানসভাৰ নিৰ্বাচনৰ তুলনাত ইয়াত জনপ্ৰিয়তা হ্ৰাস পাইছে কিয়নো সেইবাৰ গুৰুজ্যোতি দাসে তেওঁৰ প্ৰতিদ্বন্দ্বী প্ৰাৰ্থীগৰাকীক ৫০,০০০ তকৈয়ো অধিক ভোটত পৰাজিত কৰি নিৰ্বাচিত হৈছিল।

ইয়াৰ পাছত সংবাদ মাধ্যমৰ আগত দাসে তেওঁৰ পূৰ্বৰ ভাষ্যক মান্যতা দিবলৈ গৈ কয় যে এয়া মাত্ৰ এক সমীক্ষাৰ ফলহে।‘’মই এক সমীক্ষাৰ বিষয়েহে উল্লেখ কৰিছিলো, ভোটগ্ৰহণৰ সময়ত ব্যৱধান ব্যাপক বৃদ্ধি পাব,’’-তেওঁ লগতে কয়। ধৰ্মীয় সংখ্যালঘু অঞ্চলৰ সীমিত সংখ্যৰ ৰাইজৰ উপস্থিতিত ৰঞ্জিতে লগতে দাবী কৰে যে বিজেপি আৰু ইয়াৰ মিত্ৰজোঁটে ৰাজ্যখনৰ ১৪ আসনতেই জয়লাভ কৰিব।

ডিফু লোকসভা আসনখনৰ কথা বিশেষভাৱে উল্লেখ কৰি তেওঁ ঘোষণা কৰে যে যদি ইয়াৰ প্ৰাৰ্থীজন পৰাজিত হয় তেতিয়াহ’লে তেওঁ চিৰদিনৰ বাবে ৰাজনীতি ত্যাগ কৰিব।

ইয়াৰ পূৰ্বে আন এটা কাৰ্যকালৰ বাবে নৰেন্দ্ৰ মোডীক ক্ষমতালৈ অনাৰ গুৰুত্ব সম্পৰ্কে ক’বলৈ গৈ দাসে কয়, ‘’ ভাৰতবৰ্ষত বিজেপিয়ে হৈছে একমাত্ৰ ৰাজনৈতিক দল যিয়ে প্ৰয়াত অটল বিহাৰী বাজপেয়ী আৰু নৰেন্দ্ৰ মোডীৰ দৰে দুগৰাকী দুখীয়া পৰিয়ালৰ সন্তানক প্ৰধান মন্ত্ৰী হিচাপে নিৰ্বাচিত কৰিছে আৰু এয়েই হৈছে দেশৰ জনসাধাৰণৰ প্ৰতি বিজেপিৰ দায়বদ্ধতাৰ প্ৰকৃত প্ৰতিফলন। সুদীৰ্ঘ দিন ধৰি দেশ শাসন কৰি অহা কংগ্ৰেছে প্ৰধান মন্ত্ৰী হিচাপে দুখীয়া পৰিয়ালৰ এজন লোকক নিৰ্বাচিত কৰাৰ কথা কল্পনাই কৰিব নোৱাৰে।‘’

ধুবুৰীৰ এআইয়ুডিএফৰ প্ৰাৰ্থী বদৰুদ্দিন আজমলক ধুবুৰীত এগৰাকী বেদখলকাৰী বুলি অভিহিত কৰি বিজেপিৰ ৰাজ্যিক সভাপতিগৰাকীয়ে কয় যে ধুবুৰীৰ ৰাইজে এই নিৰ্বাচনত বেদখলকাৰীক উচ্ছেদ কৰিব।

উক্ত নিৰ্বাচনী সভাখনত মঙলদৈ সমষ্টিৰ বিধায়ক গুৰুজ্যোতি দাস আৰু ছিপাঝাৰৰ সমষ্টিৰ বিধায়ক বিনন্দ কুমাৰ শইকীয়া, বিজেপিৰ জিলা সভাপতি নিলীমা দেবী আৰু সম্পাদক শেৱালী গোস্বামী কলিতাও উপস্থিত থাকে।

তাৎপৰ্যপূৰ্ণভাৱে, অঞ্চলটোৰ কেইবাগৰাকীও ধৰ্মীয় সংখ্যালঘু সম্প্ৰদায়ৰ যুৱকে আনুষ্ঠানিকভাৱে গেৰুৱা দলটোৰ প্ৰাথমিক সদস্য পদ গ্ৰহণ কৰে।