ডিমা হাচাওত শান্তিপূৰ্ণ ভোটদান : হাফলঙত পাঁচবজালৈ মতদান ৬৫ শতাংশ

ৰাজ্যৰ আন আন  প্ৰান্তৰ লগতে আজি ৩ নম্বৰ ডিফু সংসদীয় সমষ্টিতো দ্বিতীয় পৰ্যায়ৰ ভোট গ্ৰহণ শান্তিপূৰ্ণ ভাবে অনুষ্ঠিত হৈ যায়। পাহাৰীয়া জিলাখনৰ একাধিক ঠাইত ৰাতিপুৱা ই ভি এম বিকল হোৱাক লৈ ভোটাৰ ৰাইজৰ মাজত মিশ্ৰ প্ৰতিক্ৰিয়াৰ সৃষ্টি হয় যদিও কোনোধৰণৰ অপ্ৰীতিকৰ পৰিস্থিতিৰ উদ্ভৱ নোহোৱাকৈয়ে ভোটদান প্ৰক্ৰিয়া সমাপ্ত হয়।

অৱশ্যে  মাইবাং মহকুমাৰ হোজাই সীমান্তবৰ্তী ৩ নম্বৰ মান্দাৰদিচা এল পি স্কুলত ই ভি এমত যান্ত্ৰিক বিজুতিৰ কাৰণে পাঁচ ঘন্টা পলমকৈ অৰ্থাৎ দিনৰ প্ৰায় বাৰ বাজি পোন্ধৰ মিনিটত আৰম্ভ হয় ভোট গ্ৰহণ প্ৰক্ৰিয়া। ইয়াকে লৈ ভোটাৰৰ মাজত অশান্তি কিছু পৰিমানে বৃদ্ধি পাইছিল যদিও পাছত শান্তিপূৰ্ণভাৱে অনুষ্ঠিত হয় ভোটগ্ৰহণ প্ৰক্ৰিয়া।

এই সন্দৰ্ভত ভোটকেন্দ্ৰ কেইটাৰ  প্ৰিজাইদিং বিষয়াৰ সৈতে যোগাযোগ কৰাত কয় যে যান্ত্ৰিক বিজুতিৰ কাৰণে সমস্যাৰ সৃষ্টি হৈছিল। পৰৱৰ্তী সময়ত হাফলঙৰ পৰা সংশ্লিষ্ট বিষয়া অহাৰ পাছত স্বাভাৱিক হয় ভোটগ্ৰহণ প্ৰক্ৰিয়া।

হাফলঙৰ মাজমজিয়াত থকা হাগজেৰ নগৰ এল পি স্কুলতো ই ভি এম বিকল হোৱা কাৰণে প্ৰায় এক ঘন্টা পোন্ধৰ মিনিট পলমকৈ ভোটদান প্ৰক্ৰিয়া আৰম্ভ হয়। আনহাতে মাইবাং এইচ এছ স্কুল, মাইবাঙৰ কীৰ্তিপূৰ এল পি স্কুল, মাহুৰ গাৰ্ডেনৰ এছেল এল পি স্কুল, লাঙটিঙৰ লালবং এল পি স্কুলতো ই ভি এম বিকল হোৱাৰ বাবে পলমকৈ ভোটদান প্ৰক্ৰিয়া আৰম্ভ হয়।

আনহাতে ডিমা হাচাও জিলা প্ৰশাসনৰ ফালৰ পৰা লাভ কৰা শেহতীয়া  তথ্য অনুসৰি হাফলং বিধানসভা সমষ্টিত পাঁচটালৈকে ভোটদানৰ হাৰ ৬৫ শতাংশ। কিন্তু ভোটদানৰ হাৰ বৃদ্ধি হোৱাৰ সম্ভাৱনা আছে বুলিও জনায় জিলা প্ৰশাসনে। কিয়নো একাধিক ভোটকেন্দ্ৰত সন্ধিয়া ছয় বজালৈকে ভোটদান প্ৰক্ৰিয়া চলি থকা বুলি জানিব পৰা গৈছে।