মুম্বাই ইণ্ডিয়ানছৰ বিৰুদ্ধে ৰাজস্থান ৰয়েলছৰ হৈ উজলি উঠিল ৰিয়ান পৰাগ

আই পি এলত ৰাজস্থান ৰয়েলছৰ হৈ খেলা উদীয়মান যুৱ ক্ৰিকেটাৰ অসমৰ ৰিয়ান পৰাগে শনিবাৰে ছাৱাই মানসিং ষ্টেডিয়ামত অনুষ্ঠিত এখন খেলত মুম্বাই ইণ্ডিয়ানছৰ বিৰুদ্ধে এক দৃষ্টিনন্দন ইনিংছ খেলি সকলোৰে দৃষ্টি আকৰ্ষণ কৰে। আইপিএলত এইখন আছিল ৰিয়ানৰ দ্বিতীয়খন খেল।

খেলখনত ৰিয়ানে ২৯ বলত এটা ছয় আৰু ৫টা চাৰিৰে ৪৩ ৰাণৰ এক অনবদ্য ইনিংছ খেলি মুম্বাই ইণ্ডিয়ানছৰ বিৰুদ্ধে ৰাজস্থান ৰয়েলছৰ বিজয়ত বিশেষ ভূমিকা পালন কৰে। বেটিক্ৰমৰ পঞ্চম স্থানত বেট ধৰিবলৈ অহা ৰিয়ানে খেলা শ্বটসমূহ অতি পৰিপক্ক আৰু প্ৰত্যয়জনক আছিল।

আনহাতে, ৰিয়ানে খেলাৰ সময়ত এখন পৰম্পৰাগত অসমীয়া গামোচা কঁকালত খুচি লোৱা দৃশ্য ছচিয়েল মিডিয়াত ভাইৰেল হৈ পৰে। খেলখনত ৰিয়ানক ষ্টাইলিষ্ট প্লেয়াৰ অফ দ্য মেচ সন্মান লাভ কৰে।

ৰিয়ানে মুম্বাই ইণ্ডিয়ানছৰ বিপক্ষে বলিং কৰি ২ অভাৰত ১৭ ৰাণ খৰচ কৰে।

উদীয়মান ক্ৰিকেটাৰগৰাকীয়ে যোৱা ১১ এপ্ৰিলত ছাৱাই মানসিং ষ্টেডিয়ামত চেন্নাই ছুপাৰ কিংছৰ বিৰুদ্ধে আইপিএলৰ প্ৰথমখন মেচ খেলিছিল।

শনিবাৰে খেলা ৰিয়ানৰ ইনিংছটোৰ বাবে ৰাজস্থান ৰয়েলছৰ অধিনায়ক ষ্টিফেন স্মিথে ৰিয়ান পৰাগক বিশেষভাৱে প্ৰশংসা কৰিছে।