প্ৰদ্যুত বৰদলৈৰ মতে বিজেপি ধৰ্মীয় মেৰুকৰণত সফল হৈছে

নগাওঁ লোকসভা সমষ্টিৰ বিজয়ী প্ৰদ্যুত বৰদলৈৰ মতে বিজেপিয়ে সদ্যসমাপ্ত নিৰ্বাচনটোত ধৰ্মীয় মেৰুকৰণৰ চলাইছিল আৰু এইক্ষেত্ৰত তেওঁলোক সফলো হৈছে।

দেওবাৰে গুৱাহাটীৰ হোটেল অম্বৰীশত এখন সংবাদমেল অনুষ্ঠিত কৰি বৰদলৈয়ে কয় যে বিজেপিয়ে নৰেন্দ্ৰ মোদী আৰু অমিত শ্বাহৰ নেতৃত্বত যিধৰণে এক পৰিৱেশৰ সৃষ্টি কৰিছিল তাত তেওঁলোক সফল হৈছে।

তেওঁ কয়, “বিজেপিৰ জয়ন্ত মল্ল বৰুৱাই কৈছিল নগাঁৱত হিন্দুৰ সংখ্যা সৰ্বাধিক গতিকে তাত কংগ্ৰেছ জিকিব নোৱাৰে। এই কথাই তেওঁলোকৰ ধৰ্মীয় মেৰুকৰণৰ চেষ্টাক প্ৰমাণ কৰে।”

নগাঁৱত প্ৰায় ৫১% ভোট লাভ কৰা বুলি সদৰী কৰি প্ৰদ্যুত বৰদলৈয়ে সংবাদমেলত কয়, “নগাঁও সমষ্টিত ৩৪% মুছলমান আছে।” যদি মুছলমানৰ ভোটতেই কংগ্ৰেছ জিকিছে তেনেহ’লে বাকী ভোট কোনে দিলে বুলি বৰদলৈয়ে প্ৰশ্ন কৰে।

তেওঁ সকলো জাতি-ধৰ্মৰ লোকৰে ভোট পোৱা বুলি দাবী কৰি সকলো জাতি-জনগোষ্ঠী-ধৰ্মাৱলম্বী লোকৰ ভোট নাপালে নগাঁৱত জয়ী হোৱাটো অসম্ভৱ বুলিও তেওঁ কয়।

“বিজেপিৰ এনে ধৰণৰ অতি বিপজ্জনক ৰাজনৈতিক বিশ্লেষণে সমাজখনৰ ক্ষতি কৰিছে”, প্ৰদ্যুত বৰদলৈয়ে কয়।

বিজেপিৰ মেৰুকৰণৰ বিপৰীতে মধ্য অসম বিশেষকৈ নগাওঁ আৰু কলিয়াবৰৰ ৰাইজে এক সুস্থ বাৰ্তা দিছে বুলিও তেওঁ কয়।

নগাঁৱত ৰাজেন গোহাঁইৰ পৰা কোনো প্ৰত্যক্ষ বা পৰোক্ষ সহায় পোৱা নাই বুলিও কয় বৰদলৈয়ে। প্ৰাক্তন মুখ্য মন্ত্ৰী প্ৰফুল্ল কুমাৰ মহন্তৰ সমষ্টি বঢ়মপুৰতো তেওঁ ভোট কম পোৱা বুলি কয়।

ইয়াৰ বিপৰীতে বিজেপিৰ দখলত থকা নগাওঁ, হোজাই, লামডিং আদি বিধানসভা সমষ্টিত বিজেপিৰ প্ৰায় সমানেই ভোট পোৱা বুলি দাবী কৰে।

নগাঁৱত এ আই য়ু ডি এফে প্ৰাৰ্থী নিদিয়াটো দলটোৰ বাবে সুমতি বুলিও কয়। অৱশ্যে এ আই য়ু ডি এফৰ একাংশ নেতাই নগাঁৱত বিজেপিক ভোট দিবলৈ বহুতক কৈছিল বুলিও কয়।

কংগ্ৰেছৰ প্ৰতি ৰাইজে সঁহাৰি নজনোৱা বিষয়টোত দলটোৰ ক্ৰুটি থকা বুলি বৰদলৈয়ে কয়।

কংগ্ৰেছৰ একাংশ জ্যেষ্ঠ নেতাই প্ৰদেশ কংগ্ৰেছৰ সভাপতি ৰিপুণ বৰাৰ বিৰোধিতা কৰা কাৰ্যক তেওঁ দৃষ্টিকটু হোৱা বুলি কয় আৰু ই দলক ক্ষতি কৰিব বুলি মন্তব্য কৰে।

তেওঁলোকৰ বিৰূদ্ধে ব্যৱস্থা গ্ৰহণ কৰিব লাগে বুলিও মন্তব্য কৰে প্ৰদ্যুত বৰদলৈয়ে।