পুৰণিগুদামত সংঘটিত পথ দুৰ্ঘটনাত গুৰুতৰভাৱে আহত এজন লোক

নগাঁৱৰ পুৰণিগুদামৰ কেঞাপট্টীত শুকুৰবাৰে নিশা প্ৰায় এঘাৰ মান বজাত সংঘটিত হয় এক ভয়াবহ পথ দুৰ্ঘটনা। এখন অচিনাক্ত বাহনে এখন বাইকক মহটিয়াই নিয়াৰ ফলতেই দুৰ্ঘটনাটো সংঘটিত হয়।

অচিনাক্ত বাহনখনে এ এছ-০২আৰ-২৪৬৩ নম্বৰৰ বাইকখনক খুন্দা মাৰি পথৰ দাঁতিত বাইকসহ আৰোহী গৰাকীক মুমূৰ্ষু অৱস্থাত পেলাই থৈ যায়।

দুৰ্ঘটনাটোৰ পাছতেই পুৰণিগুদাম আৰক্ষীয়ে স্থানীয় ৰাইজৰ সহযোগত সংকটজনক অৱস্থাত বাইক আৰোহীজনক নগাঁও অসামৰিক চিকিৎসালয়লৈ প্ৰেৰণ কৰে।

উল্লেখ্য যে, ৩৭নং ৰাষ্ট্ৰীয় ঘাইপথ মেৰামতিত চূড়ান্ত বিসংগতি হোৱা বাবেই দুৰ্ঘটনাটো সংঘটিত হোৱাৰ অভিযোগ কৰিছে স্থানীয় ৰাইজে। ৰাইজে লগতে গড়কাপ্টানী বিভাগৰ বিৰুদ্ধে তীব্ৰ ক্ষোভ উজাৰে।

ইয়াৰোপৰি ৰাষ্ট্ৰীয় ঘাইপথৰ দুৰৱস্থাৰ বাবেই পুৰণিগুদামৰ কেঞাপট্টীত শুকুৰবাৰে পুৱাৰে পৰা নিশা পৰ্য্যন্ত  তিনিটাকৈ সৰু-বৰ পথ দুৰ্ঘটনা সংঘটিত হোৱাৰ লগতে তিনিজনকৈ লোক আহত হয়।

পুৰণিগুদাম অঞ্চলত সঘনাই সংঘটিত হৈ থকা পথ দুৰ্ঘটনাত স্থানীয় ৰাইজে উদ্বিগ্নতা প্ৰকাশ কৰে।