মই জীয়াই থকালৈ এন আৰ চি হ’বলৈ নিদিওঁ : কলকাতাৰ ৰাজপথত মমতাৰ বজ্ৰ হুংকাৰ

অসমৰ ৰাষ্ট্ৰীয় নাগৰিক পঞ্জীৰ বিৰুদ্ধে বৃহস্পতিবাৰে কলকাতাৰ ৰাজপথত বৃহৎ প্ৰতিবাদত নমা দেখা গ’ল পশ্চিম বংগৰ মুখ্য মন্ত্ৰী মমতা বেনাৰ্জীক।

কলকাতাৰ ৰাজপথত ছিন্থিমোৰৰ পৰা শ্যাম বাজাৰলৈ হোৱা বৃহৎ প্ৰতিবাদী সমদলক নেতৃত্ব দি মমতা বেনাৰ্জীয়ে বিজেপি চৰকাৰক কঠোৰ সমালোচনা কৰে।

দলীয় কৰ্মীসকলক সম্বোধি দিয়া ভাষণত মমতা বেনাৰ্জীয়ে তেওঁ জীয়াই থকালৈ পশ্চিমবংগত কেতিয়াও এন আৰ চি হ’ব নিদিয়ে বুলি কয়।

‘মই এন আৰ চিক গৰিহনা আৰু ধিক্কাৰ দিছো’-প্ৰতিবাদী কণ্ঠেৰে মমতাই কয়।

আনহাতে, অসমৰ এন আৰ চিৰ পৰা বাদ পৰা ১৯ লাখ লোকৰ ভিতৰত ১২ লাখেই হিন্দু বুলি উল্লেখ কৰি মমতা বেনাৰ্জীয়ে অসমত জনতাৰ কণ্ঠৰোধ কৰাৰ দৰে কলকাতাত জনতাৰ কণ্ঠৰোধ কৰিব নোৱাৰিব বুলি বিজেপিক সকীয়নি দিয়ে।

বিজেপি চৰকাৰে এন আৰ চিৰ নামত অসমক এখন জেলত পৰিণত কৰা বুলিও মমতাই সমালোচনা কৰে।

তদুপৰি, পশ্চিম বংগৰ বিজেপিৰ সভাপতি দিলীপ ঘোষে পশ্চিম বংগত প্ৰায় ২ কোটি অনুপ্ৰৱেশকাৰী আছে বুলি কৰা মন্তব্যৰ প্ৰতিক্ৰিয়া প্ৰকাশ কৰি পশ্চিমবংগৰ মুখ্য মন্ত্ৰীগৰাকীয়ে ২ কোটি বেলেগ কথা সাহস আছে যদি পশ্চিমবংগৰ পৰা মাত্ৰ দুজন মানুহক আঁতৰ কৰি দেখুৱাক বুলি প্ৰত্যাহবান জনায়।

মমতা বেনাৰ্জীয়ে বিজেপি চৰকাৰে এন ৰ চিৰ বিষয়ত জুইৰ সৈতে খেলা কৰিছে বুলিও বিস্ফোৰক মন্তব্য প্ৰকাশ কৰে।