মণিপুৰত সশস্ত্ৰ দুৰ্বৃত্তই জ্বলাই দিলে এটা সম্প্ৰদায়ৰ এখন গাওঁ

মণিপুৰৰ সেনাপতি জিলাত আজি পুৱাতেই সশস্ত্ৰ মাৰাম নাগা দুৰ্বৃত্তই মাখান নাগা সম্প্ৰদায়ৰ এখন গাৱঁৰ বহুকেইটা ঘৰ জ্বলাই দিয়ে।

আক্ৰমণৰ বলি হোৱা গাওঁখনৰ নাম মাখান খুমান গাওঁ আৰু ই সেনাপতি জিলাৰ মাও-মাৰাম মহকুমাৰ অন্তৰ্গত।

দল বান্ধি অহা সশস্ত্ৰ দুৰ্বৃত্তকেইজনক মাৰাম খুলেন চাৰ্কল য়ুনিয়নৰ সদস্য বুলি সন্দেহ কৰা হৈছে। তেওঁলোকৰ হাতত এ কে ফৰ্টি ছেৱেন আৰু এম ছিক্সটিনৰ দৰে মাৰণাস্ত্ৰ আছিল বুলি সূত্ৰটোৰ দাবী।

ঘটনাটোক অমানৱীয় আৰু বৰ্বৰ আখ্যা দি মাখান সম্প্ৰদায়ৰ দল-সংগঠনে দুৰ্বৃত্তক ধৰিবলৈ দাবী কৰি ইম্ফল-ডিমাপুৰ ২ নং ৰাষ্ট্ৰীয় ঘাইপথত সকলো যান-বাহনৰ চলাচল বন্ধ কৰি দিছে।

প্ৰশসনে ২৪ ঘণ্টাৰ ভিতৰত দুৰ্বৃত্তক ধৰিব নোৱাৰিলে তেওঁলোকে ৰাষ্ট্ৰীয় ঘাইপথটো অনিৰ্দিষ্টকালৰ বাবে বন্ধ কৰি দিব বুলি ভাবুকি দিয়ে।

“যিকোনো অপ্ৰীতিকৰ পৰিস্থিতিৰ বাবে চৰকাৰ দায়ী হ’ব” মাখান সম্প্ৰদায়ৰ সংগঠনবোৰে কয়।

বহু যুগ ধৰি শান্তিপূৰ্ণ প্ৰতিৱেশীৰ দৰে বাস কৰি অহা মাখান গাওঁ আৰু মাৰাম খুলেন গাওঁ দুখনৰ মাজত ২০১৪ চনতে এটা ভূমি বিবাদে তিক্ত সম্পৰ্কৰ সৃষ্টি কৰিছিল।

২০১৪ চনত মাৰাম বজাৰত হোৱা দুয়োটা ফৈদৰ এটা সশস্ত্ৰ সংঘৰ্ষত ২জন লোক আহত হৈছিল আৰু ৬টাকৈ ঘৰ জ্বলাই দিয়া হৈছিল। উক্ত আক্ৰমণত মাখান গাৱঁৰ দুৰ্বৃত্তই বিবদমান ভূমিত নতুনকৈ মাৰাম সম্প্ৰদায়ৰ লোকে স্থাপন কৰা ঘৰবোৰত আক্ৰমণ কৰিছিল।