এন আৰ চিৰ ভয়ত পশ্চিম বংগত ছয়গৰাকী লোকৰ প্ৰাণ গ’ল : মমতা বেনাৰ্জী

এন আৰ চিৰ ভয়ত পশ্চিম বংগত ছয়গৰাকী লোকৰ মৃত্যু হোৱা বুলি সোমবাৰে অভিযোগ উত্থাপন কৰিছে মুখ্য মন্ত্ৰী মমতা বেনাৰ্জীয়ে।

ত্ৰিণামূল কংগ্ৰেছৰ স্বীকৃতিপ্ৰাপ্ত ভাৰতীয় জাতীয় ত্ৰিণামূল বাণিজ্য সংঘ কংগ্ৰেছৰ এখন সভা সম্বোধন কৰি বেনাৰ্জীয়ে তেওঁ কেতিয়াও পশ্চিম বংগত এন আৰ চি হ’বলৈ নিদিয়ে বুলি মন্তব্য কৰে।

অসম চুক্তিত উল্লেখ থকা বাবেহে অসমত এন আৰ চি উন্নীতকৰণ কৰা হৈছে বুলি মন্তব্য কৰি মমতাই দেশৰ অন্য প্ৰান্তত এন আৰ চিৰ প্ৰয়োজন নাই বুলি কয়।

বিজেপিয়ে পশ্চিম বংগত এন আৰ চিৰ নাম লৈ ধৰ্মৰ নামত বিভাজন আনি মানুহৰ মনত ভয় আৰু শংকাৰ সৃষ্টি কৰিবলৈ চেষ্টা কৰি থকা বুলিও মমতাই গেৰুৱা দলটোক কঠোৰ সমালোচনা কৰে।

বিহাৰৰ মুখ্য মন্ত্ৰী নিতিশ কুমাৰে বিহাৰত এন আৰ চিৰ বিৰোধিতা কৰাৰ পাছত বিজেপিয়ে কি যুক্তিত পশ্চিম বংগত এন আৰ চি আনিব বুলি সভাত তেওঁ প্ৰশ্ন কৰে।

যদিহে বিজেপিয়ে এন আৰ চিৰ প্ৰতি ইমানেই আগ্ৰহী তেন্তে কিয় তেওঁলোকে বিজেপি শাসিত ত্ৰিপুৰাত এন আৰ চি নানে বুলিও মমতাই প্ৰশ্ন কৰি ত্ৰিপুৰাৰ মুখ্য মন্ত্ৰী বিপ্লৱ কুমাৰ দেৱে নিজেই এই তালিকাৰ পৰা আতৰত আছে বুলি মত প্ৰকাশ কৰে।

এন আৰ চিত প্ৰয়োজন হোৱা পুৰণি নথি-পত্ৰ বিচাৰি উলিওৱাটো জনসাধাৰণৰ বাবে এটা কঠিন আৰু অসম্ভৱ কাম বুলি মুখ্য মন্ত্ৰীগৰাকীয়ে লগতে কয়।

‘‘মোৰ নথি-পত্ৰ বিচাৰিবলৈ তেওঁলোক কোন? বহু বছৰ পাছত যেতিয়া এইবোৰৰ প্ৰয়োজন হ’ব সেই নথি-পত্ৰবোৰ চাগে প্ৰয়োজনীয় বিভাগৰ পৰাও প্ৰাকৃতিক দুৰ্যোগ আৰু বিভিন্ন কাৰণত হেৰাই গৈছে,’’ মমতাই উল্লেখ কৰে।

আনহাতে, ত্ৰিণামূল কংগ্ৰেছে কলকাতাত বৃহস্পতিবাৰ আৰু শুকুৰবাৰে এক প্ৰতিবাদী সমদল বাহিৰ কৰিব বুলিও ত্ৰিণামূল কৰ্মীসকলে জানিবলৈ দিয়ে।