ওদালগুৰিত জনজাতিকৰণৰ দাবীত মানৱ শৃংখল গঠনেৰে আদিৱাসী ছাত্ৰ সন্থাৰ প্ৰতিবাদ

সদৌ অসম আদিৱাসী ছাত্ৰ সন্থাই মঙলবাৰে জনজাতিকৰণৰ দাবীত ওডালগুৰি জিলাৰ পানেৰীৰ ওদালগুৰি-তামুলপুৰ পথত মানৱ শৃংখল গঠনেৰে প্ৰতিবাদ সাব্যস্ত কৰে।

প্ৰতিবাদী কাৰ্য্যসূচীৰ সময়ত শতাধিক প্ৰতিবাদকাৰীয়ে হাতে হাতে প্লে-কাৰ্ড লৈ বিভিন্ন শ্লোগানেৰে পৰিবেশ উত্তপ্ত কৰি তোলে।

প্ৰতিবাদ স্থলীত বামুণজুলি, পানেৰী, হাতীগড, ওৰাংজুলিকে কৰি বহুকেইখন চাহ বাগিচাৰ প্ৰায় ৬০০ ৰো অধিক চাহ শ্ৰমিকে অংশগ্ৰহণ কৰি মানৱ শৃংখল গঠন কৰে।

ৰাজপথত মানৱ শৃংখল গঠনেৰে প্ৰতিবাদ সাব্যস্ত কৰাৰ সময়ত প্ৰতিবাদকাৰী সকলে যান-বাহনৰ চলাচল ব্যাহত নোহোৱাকৈ প্ৰায় দুঘণ্টা সময় ধৰি প্ৰতিবাদ সাব্যস্ত কৰে।

‘‘এয়া চৰকাৰৰ সন্মুখত আমি ঐক্যবদ্ধ হৈ থকাৰ এক প্ৰতীকি উপস্থাপন। আমি চৰকাৰৰ ওচৰত আমাৰ সাংবিধানিক অধিকাৰ বিচাৰি শান্তিপূৰ্ণভাৱে প্ৰতিবাদ সাব্যস্ত কৰিছো,’’ লক্ষ্মণ পূজা নামৰ এগৰাকী প্ৰতিবাদকাৰীয়ে কয়।

‘‘অন্য ৰাজ্যত আমাৰ ভাই-ভনী সকলে জনজাতিৰ মৰ্যদা লাভ কৰিছে কিন্তু অসমত স্বাধীনতাৰ পাছৰে পৰা আমাক আমাৰ অধিকাৰৰ পৰা বঞ্চিত কৰি অহা হৈছে। কেনেদৰে এটা সম্প্ৰদায়ক পৃথক পৃথক অঞ্চলত পৃথক পৃথক ধৰণে চিহ্নিত কৰা হৈছে,’’ দুৰপতি লোহাৰ নামৰ এগৰাকী প্ৰতিবাদকাৰীয়ে এনেদৰে প্ৰশ্ন কৰে।

আনাহাতে, ওদালগুৰি ছাত্ৰ সন্থাৰ সভাপতি ৰবীন গোৱালাই তেওঁলোকে আদিবাসী লেণ্ড বিচৰা নাই মাত্ৰ ভাৰতীয় সংবিধান অনুসৰি জনজাতিৰ মৰ্যদাহে বিচাৰিছে বুলি মন্তব্য কৰে।