“কা” বিৰোধী আন্দোলনৰ পাঁচ চহিদলৈ ২ লাখ টকা কৈ সাহায্য ৰাহুল গান্ধীৰ

দিল্লী অভিমুখে ৰাওনা হোৱাৰ পূৰ্বে নিখিল ভাৰত কংগ্ৰেছ কমিটীৰ তৰফৰ পৰা সাংসদ তথা কংগ্ৰেছৰ ৰাষ্ট্ৰীয় নেতা ৰাহুল গান্ধীয়ে “কা” বিৰোধী আন্দোলনৰ ৫ চহিদৰ পৰিয়ালক  ২ লাখকৈ টকাৰ  আৰ্থিক সাহায্য দিয়াৰ কথা ঘোষণা কৰে।

ৰাহুল গান্ধীক বিদায় জনোৱাৰ পিছতেই বিমান বন্দৰৰ পৰা পোনে পোনে নিখিল ভাৰত কংগ্ৰেছ কমিটীৰ সাধাৰণ সম্পাদক তথা অসমৰ তত্ত্বাৱধায়ক হৰিশ ৰাৱট, প্ৰদেশ কংগ্ৰেছৰ সভাপতি ৰিপুণ বৰা, কংগ্ৰেছ বিধায়িনী দলৰ উপ-দলপতি ৰকিবুল হুছেইন আৰু ছয়গাওঁ সমষ্টিৰ বিধায়ক ৰেকিবুদ্দিন আহমেদকে ধৰি প্ৰদেশ কংগ্ৰেছৰ প্ৰতিনিধি দল এটাই চহিদ দিপাঞ্জল দাস আৰু ছেম ষ্টেফৰ্ডৰ  ঘৰলৈ গৈ ২ লাখকৈ টকা প্ৰদান কৰে।

ইপিনে ছয়গাওঁ সমষ্টিৰ বিধায়ক ৰেকিবুদ্দিন আহমেদে নিজাববীয়াকৈ ২ লাখ টকাৰ সাহায্য আগবঢ়াই দিপাঞ্জলৰ পৰিয়াললৈ। সেই ধনেৰে দিপাঞ্জলৰ পিতৃক এখন ই-ৰিক্সা ক্ৰয় কৰিবৰ বাবে অনুৰোধ জনায় ৰেকিবুদ্দিনে।

ইয়াৰোপৰি বিধায়কজনে দীপাঞ্জলৰ চহিদ বেদী নিৰ্মাণৰ বাবেও সাহায্য আগবঢ়াব বুলি জানিবলৈ দিয়ে।

আনহাতে কাইলৈ ৰাৱটৰ নেতৃত্বত প্ৰদেশ কংগ্ৰেছৰ প্ৰতিনিধি দল এটাই ওডালগুৰি আৰু ভৱানীপুৰলৈ গৈ আন দুজন চহিদৰ পৰিয়ালক ২ লাখ টকাৰ সাহায্য আগবঢ়াব বুলি জানিবলৈ দিয়ে ভাৰতীয় জাতীয় কংগ্ৰেছৰ সাধাৰণ সম্পাদক হৰিশ ৰাৱাতে।

তাৰোপৰি দুদিন পিছত ডিব্ৰুগড়লৈ গৈ চহিদ দ্বিজেন পাংগিঙৰ পৰিয়ালক দুই লাখকৈ টকা আগবঢ়াব বুলি তেওঁ জনায়।

উল্লেখযোগ্য যে কিছুদিন পূৰ্বে প্ৰদেশ কংগ্ৰেছৰ সাধাৰণ সম্পাদক দুলু আহমেদেও চহিদ ছেম ষ্টেফ’ৰ্ডক ৫০ হাজাৰ টকাৰ সাহায্য আগবঢ়াইছিল।