স্বাধীনতা দিৱসত আলফা-এন ডি এফ বিক আলোচনালৈ অহাৰ আহ্বান হাগ্ৰামাৰ
দেশৰ ৭৩ সংখ্যক স্বাধীনতা দিৱস উপলক্ষে আজি কোকৰাঝাৰত ৰাষ্ট্ৰীয় পতাকা উত্তোলন কৰে বি টি চি প্ৰধান হাগ্ৰামা মহিলাৰীয়ে।
ৰাষ্ট্ৰীয় পতাকা উত্তোলন কৰি মহিলাৰীয়ে চহিদৰ অৱদানক স্মৰণ কৰাৰ লগতে বিদ্ৰোহী গোট আলফা স্বাধীন আৰু এন ডি এফ বিক সসস্ত্ৰ সংগ্ৰামৰ পথ পৰিত্যাগ কৰি আলোচনাৰ মেজলৈ অহাৰ আহ্বান জনায়।
উন্নয়নৰ বাবে এক শান্তিৰ পৰিৱেশৰ প্ৰয়োজন বুলি উল্লেখ কৰি ভাষণত মহিলাৰীয়ে বিগত ১৫ বছৰত বি টি চিৰ প্ৰভূত উন্নয়ন হোৱাৰ লগতে আগন্তুক সময়ছোৱাতো উন্নয়নৰ ধাৰা অব্যাহত থাকিব বুলি সদৰি কৰে।
আনহাতে জন্মু-কাশ্মীৰৰ ক্ষেত্ৰত প্ৰযোজ্য ৩৭০ আৰু ৩৫ (এ) সংবিধানৰ পৰা বাতিল কৰাত প্ৰধান মন্ত্ৰীলৈ ধন্যবাদ জ্ঞাপন কৰি চৰকাৰৰ উক্ত সিদ্ধান্তত দেশৰ জনতা আনন্দিত হৈছে বুলি মন্তব্য কৰে হাগ্ৰামা মহিলাৰীয়ে।
স্বাধীনতা দিৱসৰ আজিৰ উক্ত কাৰ্যসূচীতে মহিলাৰীয়ে কোকৰাঝাৰ আৰক্ষী, সপ্তম অসম আৰক্ষী বেটেলিয়ন, এন চি চি, স্কাউট এণ্ড গাইড আৰু বিভিন্ন বিদ্যালয়ৰ ছাত্ৰ-ছাত্ৰীয়ে পৰিৱেশন কৰা কুচকাৱাজৰ অভিবাদন গ্ৰহণ কৰে আৰু বিভিন্ন ক্ষেত্ৰত পাৰদৰ্শিতা দেখুওৱা কেইবগৰাকী ব্যাক্তিক মানপত্ৰ আৰু আৰনাইৰে সম্বৰ্ধনা জ্ঞাপন কৰে।