যুঁজাৰু বিমান অৱতৰণৰ বাবে উপযুক্ত ঘাইপথ নিৰ্মাণৰ ঘোষণা অসম চৰকাৰৰ

এইবাৰ অসমৰ ৰাষ্ট্ৰীয় ঘাইপথ যুঁজাৰো বিমান অৱতৰণ কৰিব পৰাকৈ নিৰ্মান কৰিব অসম চৰকাৰে। যাতে যিকোনো জৰুৰী অৱস্থাত যুদ্ধ বিমান অৱতৰণৰ উপযোগী হয়। জানিব পৰা মতে, ইতিমধ্যে ডিব্ৰুগড় জিলাৰ ৩৭ নং ৰাষ্ট্ৰীয় ঘাইপথৰ ৪ কিলোমিটাৰ দৈৰ্ঘ্যৰ এটা পথ সুখয় আৰু ৰাফেলৰ দৰে যুদ্ধ বিমান অৱতৰণৰ বাবে উপযোগী কৰি তোলা হৈছে।

এই আধুনিক পথটোৱে ভাৰতৰ উত্তৰ-পূব সীমান্তৰ যিকোনো পৰিস্থিতিৰ সৈতে মোকাবিলা কৰাত বায়ুসেনাক সহায় কৰিব বুলি আশা কৰা হৈছে।’ কেৱল এয়াই নহয় আগন্তুক দিনত অসমৰ আৰু দুটা পথ বিমান অৱতৰণৰ উপযোগী কৰি তোলা হৈছে বুলি জানিব পৰা গৈছে। ৰাজ্য চৰকাৰে জনাইছে যে অনাগত দিনত অসমৰ বকৰা-টিহু ৰাষ্ট্ৰীয় ঘাইপথ আৰু হোজাই জিলাৰ শংকৰপুৰ অঞ্চলত বিমান অৱতৰণৰ উপযোগী এনে পথ নিৰ্মাণ কৰা হ’ব।

মন কৰিবলগীয়া যে শেহতীয়াকৈ কেন্দ্ৰই ৰাজ্য চৰকাৰসমূহৰ সহযোগত ৰাষ্ট্ৰীয় ঘাইপথসমূহ বিমান অৱতৰণৰ উপযোগী কৰি তোলাৰ কাম আৰম্ভ কৰিছে। বিমান অৱতৰণৰ উপযোগী এনে পথ দেশৰ বহু ঠাইত নিৰ্মাণ কৰি থকা হৈছে। জ্ঞাত সূত্ৰৰ মতে, এই পদক্ষেপ কেৱল সামৰিক দৃষ্টিকোণৰ পৰাই নহয়, যিকোনো কঠিন পৰিস্থিতিতো ফলপ্ৰসূ হ’ব। এই অত্যাধুনিক পথটো যুদ্ধকালীন পৰিস্থিতিতো উপযোগী হ’ব বুলি সদৰী কৰিছে।