আজি বন্ধৰ মাজতে ডিব্ৰুগড় জিলাত উৰিল আলফা (স্বা)ৰ পতাকা

নাগৰিকত্ব সংশোধনী বিধেয়ক বাতিলৰ দাবীত নেছ’ই আহ্বান জনোৱা উত্তৰ-পূৰ্বাঞ্চল বন্ধৰ সৰ্বাত্মক প্ৰভাৱ পৰে সমগ্ৰ ৰাজ্যতে। ইয়াৰ মাজতে আজি ডিব্ৰুগড়ৰ এখন বিদ্যালয়ৰ গেটত উৰিল আলফা (স্বা)ৰ পতাকা।

উল্লেখযোগ্য যে জাতি ধ্বংসী নাগৰিকত্ব বিধেয়কৰ বিৰোধিতা জনাই আজি নেছ’ই আহ্বান জনোৱা বন্ধৰ মাজতে জিলাখনৰ এখন বিদ্যালয়ৰ গেটত আলফা (স্বা)ৰ পতাকা ওলোৱা ঘটনাই তাৎপৰ্য বহন কৰিছে।

জানিব পৰা মতে স্থানীয় ৰাইজে আজি পুৱাৰ ভাগত জিলাখনৰ বৰবৰুৱা প্ৰাথমিক মাধ্যমিক বিদ্যালয়ৰ প্ৰৱেশ দ্বাৰত আলফা (স্বা)ৰ পতাকাখন দেখা পায়। ফলত স্থানীয় ৰাইজে এই কথা স্থানীয় আৰক্ষীক জনোৱাত আৰক্ষী আহি ঘটনাস্থলীত উপস্থিত হৈ আলফা (স্বা)ৰ পতাকাখন গেটৰ পৰা আঁতৰাই দিয়ে।

বৰবৰুৱা আৰক্ষী চকীৰ পৰা মাত্ৰ ৫০০ মিটাৰ দূৰত অৱস্থিত বৰবৰুৱা প্ৰাথমিক বিদ্যালয়খনত কোনো দুৰ্বৃত্তই আলফা (স্বা)ৰ পতাকাখন আৰিঁ থৈ যোৱা বুলি ডিব্ৰুগড়ৰ আৰক্ষী অধীক্ষকে কয়।

আৰক্ষী অধীক্ষক গৰাকীয়ে কয় যে, “কোনো দুৰ্বৃত্তই বৰবৰুৱা প্ৰাথমিক বিদ্যালয়ৰ গেটত আলফা (স্বা)ৰ পতাকাখন আঁৰি থৈ যায়। কিন্তু এইখন দেখাত আলফা (স্বা)ৰ পতাকাৰ দৰে একে নহয়। আমি পতাকাখন জব্দ কৰিছো তদন্ত আৰম্ভ কৰিছো।”

আনহাতে আজি শিৱসাগৰ জিলাৰ নাজিৰাতো আলফা (স্বা)ৰ পতাকা ওলাই। কিন্তু এই আলফা (স্বা)ৰ পতাকাখন ক’ৰ পৰা আহিল সেই সম্পৰ্কত জানিব পৰা হোৱা নাই।