‘হিন্দী কব নজনা সকলে সভাৰ পৰা ওলাই যাওক’— কোনে দিলে এই নিৰ্দেশ?

উত্তৰ ভাৰতত হিন্দী বলয়ৰ আধিপত্যৰ কথা পুনৰবাৰ প্ৰমাণ কৰিবলৈ গৈ বিপদত পৰিল আয়ুষ দপ্তৰৰ সচিব বৈদ্য ৰাজেশ কটেছা।

নতুন দিল্লীত আয়োজন কৰা আয়ুষৰ এক প্ৰশিক্ষণ কাৰ্যসূচীত ভাগ লোৱা লোক সকলক উদ্দেশ্যি আয়ুষৰ সচিব গৰাকীয়ে এই বুলি কৈছিল যে যি সকল লোকে হিন্দী ভাষা কব নাজানে তেওঁলোকে সভাৰ পৰা ওলাই যাওক।

সচিব গৰাকীয়ে মূলতঃ দক্ষিণ ভাৰতৰ প্ৰতিনিধি সকলক লক্ষ্য কৰিয়েই এনেদৰে কোৱা বুলি বহুতৰে ধাৰণা হোৱাৰ পিছতে দক্ষিণ ভাৰতৰ কেইবাজনো শীৰ্ষ ৰাজনীতিকে এতিয়া উভতি ধৰিছে আয়ুষৰ সচিব গৰাকীক।

তামিলনাড়ুৰ থুথুকুডি সমষ্টিৰ ডি এম কে সাংসদ কানিমঝিয়ে আয়ুষৰ সচিব গৰাকীৰ বক্তব্যক চোকা সমালোচনা কৰি কৈছে যে সচিব গৰাকীৰ এনে মন্তব্যই বহুতৰে মনত আঘাত দিছে।

The statement of Secretary of the Union Ministry of AYUSH Vaidya Rajesh Kotecha that non Hindi speaking participants could leave during a Ministry’s training session speaks volumes about the Hindi domination being imposed.This is highly condemnable… 1/4#StopHindiImposition

— Kanimozhi (கனிமொழி) (@KanimozhiDMK) August 22, 2020

সাংসদ গৰাকীয়ে আয়ুষৰ সচিব গৰাকীক অনতিপলমে নিলম্বিত কৰাৰ দাবী উত্থাপন কৰিছে।

দক্ষিণ ভাৰতৰ আন এগৰাকী সাংসদ কাৰ্তি চিদাম্বৰমে এই প্ৰসংগত প্ৰতিক্ৰিয়া ব্যক্ত কৰি কয় যে কোনোৱাই হিন্দী ভাষা কবলৈ নাজানিব পাৰে।

সেইবুলি তেওঁলোকক সভাৰ পৰা বাহিৰ হৈ যাবলৈ কোৱাটো কোনো পধ্যে মানি লব পৰা বিধৰ কথা নহয়।

তেওঁ সচিব গৰাকীৰ বিৰুদ্ধে শাস্তিমূলক ব্যৱস্থা গ্ৰহণৰ দাবী উত্থাপন কৰে।