হেলমেট পৰিধান নকৰা বাইক চালকৰ বিৰুদ্ধে বাক্সা জিলা পৰিবহন বিভাগৰ অভিযান, বিহিলে জৰিমনা

বাক্সাৰ তামুলপুৰত হেলমেট পৰিধান নকৰা বাইক চালকৰ বিৰুদ্ধে বাক্সা জিলা পৰিবহন বিভাগে অভিযান চলায়। বৃহস্পতিবাৰে ৰঙিয়া-তামুলপুৰ-ভূটান পথত এই অভিযান চলোৱা হয়।

নৱবৰ্ষত দুৰ্ঘটনা ৰোধৰ উদ্দেশ্যে মুখ্যমন্ত্ৰীৰ নিৰ্দেশ মানি হেলমেট পৰিধান নকৰা মটৰ চাইকেল আৰোহী আৰু মদ্যপান কৰি গাড়ী চলোৱা চালকৰ বিৰুদ্ধে এই অভিযান চলায় বাক্সা জিলা পৰিবহন বিভাগে।

পৰিবহণ বিভাগৰ এনফৰ্চমেণ্ট পৰিদৰ্শক সত্যনাথ বড়োৰ নেতৃত্বত চলে এই অভিযান।

বাক্সা জিলা পৰিবহন বিভাগৰ বিষয়া-কৰ্মচাৰীয়ে তামুলপুৰ আৰক্ষী আৰু আবকাৰী বিভাগৰ সহযোগত যান বাহন আইন ভংগকাৰীৰ বিৰুদ্ধে এই অভিযান চলায়।

অভিযান কালত হেলমেট পৰিধান নকৰা প্ৰায় ৩০ খন দুচকীয়া বাহনৰ পৰা  ১০০০ টকাকৈ জৰিমনা আদায় কৰা হয়।

অভিযানকালত নথি পত্ৰ নথকা কেইবাখন বাহনো জব্দ কৰা হয়।

ইপিনে, হেলমেট পৰিধান নকৰাকৈ আৰু মদ্যপান কৰি গাড়ী নচলাবলৈ ৰাইজক অনুৰোধ জনাইছে পৰিবহন বিষয়া সত্যনাথ বড়োৱে।