আৰক্ষীৰ সন্মুখতে ডিব্ৰুগড়ত বন্ধ সমৰ্থকে বলপূৰ্বকভাৱে বন্ধ কৰিলে ব্যৱসায়িক প্ৰতিষ্ঠান
নাগৰিকত্ব সংশোধনী বিধেয়ক-২০১৬’ বাতিলৰ লগতে কেইবাটাও দাবীৰ সমৰ্থনত প্ৰায় ৬০ টাকৈ জাতীয় সংগঠনে আজি আহ্বান জনোৱা ১২ ঘণ্টীয়া অসম বন্ধৰ ফলত ডিব্ৰুগড়ত উত্তেজনাময় পৰিৱেশৰ সৃষ্টি হোৱাৰ লগতে স্তব্ধ হৈ পৰিছে স্বাভাৱিক জন-জীৱন।
বন্ধ সমৰ্থকসকলে আৰক্ষীৰ উপস্থিতিতে ডিব্ৰুগড় চহৰৰ কেইবাখনো খোলা ৰখা দোকান ভাঙি লণ্ড ভণ্ড কৰে। বন্ধ সমৰ্থকৰ এনে কাৰ্যত আৰক্ষীয়ে মৌন দৰ্শকৰ দৰে ভূমিকা গ্ৰহণ কৰাত ক্ষুব্ধ হৈ পৰিছে ব্যৱসায়ীসকল।
‘দোকান সমূহ বন্ধ ৰাখিলে আমাৰ ট্ৰেড লাইচেন্স বাতিল কৰিব বুলি জিলা প্ৰশাসনে কৈছিল। সেয়ে আমি বন্ধৰ দিনটো দোকান সমূহ খোলা ৰাখিছিলো। কিন্তু ৰাতিপুৱাতে বন্ধৰ সমৰ্থকসকলে আমাক দোকান সমূহ বন্ধ কৰিবলৈ আহ্বান জনাইছিল। ইয়াৰ এঘণ্টা মান পাছতে তেওঁলোক পুনৰ আহি আৰক্ষীৰ সন্মুখতে বলপূৰ্বকভাৱে আমাৰ দোকান সমূহ বন্ধ কৰাৰ লগতে লণ্ড ভণ্ড কৰে। আৰক্ষীয়ে নীৰৱ দৰ্শক হৈ এই সকলোবোৰ কাৰ্য চাই আছিল’। এইদৰে ডিব্ৰুগড় চহৰৰে এজন স্থানীয় ব্যৱসায়ীয়ে নৰ্থ-ইষ্ট নাওৰ আগত কয়।
তেওঁ লগতে জিলা প্ৰশাসনে ব্যৱসায়ীসকলক সুৰক্ষা দিয়াত সম্পূৰ্ণৰূপে ব্যৰ্থ হৈছে বুলিও অভিহিত কৰে।
ইফালে ডিব্ৰুগড় আৰক্ষীয়ে জিলাখনৰ বিভিন্ন প্ৰান্তৰ পৰা প্ৰায় ১০০জনৰো অধিক বন্ধ সমৰ্থকক আটক কৰি ডিব্ৰুগড় আৰক্ষী থানাত আটক কৰি ৰখা বুলি জানিব পৰা গৈছে।