পৰকীয়া প্ৰেমৰ বিৰোধিতা কৰাৰ বাবে প্ৰেমিকাৰ দুই নাবালকক ৰডৰে নিৰ্মম প্ৰহাৰ কংগ্ৰেছ নেতাৰ
বেংগালুৰুত এজন কংগ্ৰেছ নেতাৰ বিৰুদ্ধে অতি ভয়ংকৰ অভিযোগ উত্থাপন হৈছে। বেংগালুৰু উত্তৰ জিলা কংগ্ৰেছ কমিটিৰ সাধাৰণ সম্পাদক আনন্দ নাইডুৱে দুজন নাবালকক লোহাৰ ৰডৰে অতি নিৰ্মমভাৱে আক্ৰমণ কৰা বুলি জানিব পৰা গৈছে।
বাতৰি অনুসৰি আনন্দ নাইডুৰ এগৰাকী মহিলাৰ সৈতে দীৰ্ঘদিন ধৰি অবৈধ সম্পৰ্ক চলি আছিল আৰু এই সম্পৰ্কক লৈ নাবালক দুজনাই প্ৰশ্ন কৰাৰ বাবে তেওঁ খঙত অগ্নিশৰ্মা হৈ পৰে। ইয়াৰ পিছতে তেওঁ লোহাৰ ৰড লৈ ল’ৰা দুজনৰ ওপৰত জপিয়াই পৰে আৰু তেওঁলোকক বেয়াকৈ মাৰপিট কৰে।
এই ভয়ংকৰ ঘটনাক লৈ বৰ্তমান আন্নাপূৰ্ণেশ্বৰী নগৰ আৰক্ষী থানাত এক গোচৰ ৰুজু কৰা হৈছে। আৰক্ষীয়ে অভিযুক্ত কংগ্ৰেছ নেতাগৰাকীৰ বিৰুদ্ধে কঠোৰ পকচো আইনৰ অধীনত গোচৰ পঞ্জীয়ন কৰিছে। ভুক্তভোগী নাবালক দুজনৰ দেউতাকে অভিযোগ কৰিছে যে যোৱা প্ৰায় ৩-৪ বছৰ ধৰি আনন্দ নাইডুৰ তেওঁৰ পত্নীৰ সৈতে অবৈধ প্ৰেমৰ সম্পৰ্ক আছিল। যেতিয়াই তেওঁৰ সন্তানে এই অনৈতিক সম্পৰ্কৰ বিৰোধিতা কৰিছিল, তেতিয়াই নেতাগৰাকীয়ে তেওঁলোকক শাৰীৰিকভাৱে নিৰ্যাতন চলাইছিল। এই শেহতীয়া আক্ৰমণৰ ফলত ল’ৰা দুজনৰ ভৰি, হাত আৰু শৰীৰৰ বিভিন্ন অংশত গুৰুতৰ আঘাত পোৱা বুলি জানিব পৰা গৈছে।
মাৰপিটৰ ঘটনাৰ উপৰিও কংগ্ৰেছ নেতাগৰাকীৰ বিৰুদ্ধে সম্পত্তি দখলৰো এক গুৰুতৰ অভিযোগ উত্থাপন হৈছে। অভিযোগকাৰীয়ে জনোৱা মতে আনন্দ নাইডু আৰু তেওঁৰ পত্নীয়ে মিলি তেওঁৰ সন্মতি নোহোৱাকৈয়ে সম্পত্তিৰ কাগজ-পত্ৰ নিজৰ নামলৈ হস্তান্তৰ কৰি লৈছে। এই সমগ্ৰ ঘটনাই এতিয়া অঞ্চলটোত তীব্ৰ চাঞ্চল্যৰ সৃষ্টি কৰিছে। বৰ্তমান আৰক্ষীয়ে এই সমগ্ৰ বিষয়টো অতি গুৰুত্বসহকাৰে লৈছে আৰু ঘটনাৰ প্ৰকৃত সত্য উদঘাটন কৰিবলৈ তদন্ত অব্যাহত ৰাখিছে।